華語講「起床」，客話愛樣般講？
【文／范文芳∕國立清華大學中國語文學系退休教授】
一 、有三隻漢字「醒」、「省」、「興」做得擔任客語｛hong cong｝个適當用字。
1. 先從字形、字義个角度來看「醒」，本意係指從酒醉中醒過來，省，本意係指用手放眉上詳細觀察；「興」，本意係用四隻手共同舉起器皿。
2. 說文解字个解釋，興，起也。漢語文言常用成語「夙興夜寐」、「興師問」，前者指早起，後者指起兵。
3. 從字形、字義、字音个角度來看，客話常用語，興床、興起來，都指從躺睡姿態，坐企起來，只有醒過來但無下床，就毋算興床。
4. 附帶一提，客話「起屋」、「起工」、「起鼓」都指起始、開始建造，並無從躺臥姿態中坐立起來个意思。
5. 檢討台華語、台福語，都有「起床」一語，只有台客語慣用【興床】。
二、從字形結構來討論
1. 省，古字形顯示，上有左手，下係目，此為會意字，意指左手放在雙目上方額頭眉目間，遮著強光，細意觀察，字本意个重點在目。
2. 醒，係形聲字，意符係酉，指酒，星係聲符，此形聲字本指從酒醉中醒覺過來，並無一定從躺臥中企起來開始工作。
3. 興，古字形顯示，兩人以上共用雙手，扶持重物，可能係祭祀典禮用之鼎盤，因此說文解為起，引申為開啟、起來。
三、從字意之演化來討論
1. 省，本意為手遮目，仔細觀察。引申出仔細、反思、探望等意涵，古文常用語，如反省、省視、省親。省也可假借為行政區、官署，如山東省、中書省。
2. 醒，本意為酒醒，引申為睡醒、覺醒、醒目。客語常講【講毋會分醒】，就係指再樣般解說，都無法醒悟過來。
3. 興，本意為起來，有時專用在從躺臥中企起來，漢語古文【夙興夜寐】，興就指起床，客語俗話【早興三朝當一工】，興就係起床。
4. 興个引申意比較多，比論講有流行語意，如方興未艾，有產生語意，如興風作浪，有興緻語意，如豪興、酒興。
四、從字音个角度來看
1. 省，廣韻音所景切，客語有兩音，省政府音｛sen｝，省屎、省尿、省錢都音｛sang｝都係陰上調。
2. 醒，廣韻音蘇挺切，客語音｛siang｝陰上調。
3. 興，廣韻有兩音，虛陵切平聲，許應切去聲，聲母屬曉母，客語也有兩音，興趣音｛hin ci｝都屬陰去調，興床、早興三朝當一工，興音｛hong｝陰去調。
五、感想
客語【興床】，不可寫做【起床】，正如客語【起工】，不可寫作【開工】，客語【鼻公/鼻空】，不可寫成【鼻孔/鼻子】。理想个客語用漢字書寫，研究者、教學者、使用者都應該盡量顧全字形、字意、語法、語音等要領。
（海陸腔）范文芳教授 聲檔 — 華語講「起床」，客話愛樣般講？
