火燒庄
【文、圖／鍾榮富／南臺科技大學應用英語系講座教授】
「火燒庄」就係今晡日个長治鄉長興村。會分人喊著「火燒庄」，有人講係頭擺有發過大火災，險險燒忒全莊頭，故所分人安到「火燒庄」。但係六堆客人普遍个看法，還係1896年日本攻占臺灣該央時，因為砲火四射，引起大火，燒忒全莊，正分人喊到「火燒庄」。
話講1895年，清廷戰敗，將臺灣割分日本。日本人侵入臺灣，普遍引起各種不同樣式个抵抗。客人个抗日史，可以講就係臺灣總體抗日个縮小版。客人先在北部苗栗地區進行大規模个抗日戰爭，對北部打到南部，日本軍隊先在佳冬步月樓堵着客人个反抗。日本兵有現代化个武器同裝備，有戰馬、有吉普車，來回戰場，方便又遽。反觀六堆義勇軍，正正有犁耙同钁頭，或者背竹篙鬥長刀，但係大家共一心，就係硬頸同熱心。雖然雙方个武器不成比例，客人也毋驚，就恁樣打仔幾下禮拜，還係無辦法支持，六堆義勇軍一路轉進，緊打緊退，最後邱鳳揚大總理決定在火燒庄集結，做最後个抵抗。
時當晚秋農曆十一月个時節，大地一片燥渴，客人同日本雙方都毋想放棄，抗日浴血戰開始，砲火激烈，射彈一哪都係，秋風一吹，火就嗶嗶剝剝，飄飄揚揚。火燒庄接近竹葉林(德協)，到位都係麻竹，竹葉同竹殼又係最容易著火个，故所火一燒上來，就無法度阻擋，也無閒去擋。無幾久，全庄就恁樣燒淨淨，存着灰麩。後來，客人地區就佮伊安到「火燒庄」。火燒庄對無屋無庄頭，起碼又過了幾十年，漸漸个客人正轉來開莊作圳，一切重頭開始，打拚開墾，正有如今个繁榮。
一百年以後，1996年，當地邱家仕紳个後代，邱明志兄弟愐著祖先對臺灣客人个犧牲奉獻，實在值得後代懷念，故所邀客莊熱心人士，共同出錢出力，發起興建「六堆抗日紀念碑」个活動，紀念先賢拚命抵抗日本兵个歷史。於今在火燒庄活動中心隔壁，矗立了一塊六方形个紀念碑，分別寫等前、後、左、右、先鋒、中堆个字，代表六堆各地為了臺灣犧牲个先輩。雖然紀念碑毋係盡高大，外型本本係客人純樸个風格，但係紀念意義深大，有來南部客莊尞个人客，愛想了解六堆，最好來火燒庄个六堆抗日紀念碑看看啊，會有進一步个了解。
（四縣腔）鍾榮富教授 聲檔 － 火燒庄
