戰亂
【文、圖／彭欽清／國立政治大學退休教授】
民國38年國民政府在大陸打輸共產黨，盡多人撤到臺灣來，肚項公教人員過阿兵哥抾忒大碼。
有一日對大門看過去四寮坪該片，看著捼鹽捼米个阿兵哥，吾哥講佢這兜係大陸撤退來个，這一駁仔會緊來緊多。第二日就有阿兵哥歇在上坪莊項來，揹等背包、銃仔、纏等腳裹仔，有个棧伯公下，有个歇舊神社。
官較大个，帶等家竇，婦人家過細人仔毋係歇在人屋下个閒間仔，就係歇在大戶人家無用著个礱間仔抑係牛欄該。吾屋背該家人堵好有一間閒間仔，有一個擐大肚个餔娘人緊求講借佢歇，無幾久仔就降，老人家信「屋下做得借人死，無借人生」个俗，故所屋主愛這個婦人家去屋外背个浴堂項減輕。
有一個兵卒仔，聽講係偷走，部隊長喊人去同佢捉轉來，用擔竿連毆至毆將佢毆到伸半條命，放在峎頂鄧屋个牛欄脣口。𠊎同幾個細人仔伴偷走去看，看該兵仔盦盦覆等在該緊呻。𠊎轉來同吾姆講，佢講該兵卒仔還係細阿哥仔，打到恁樣，實在還衰過。
先來个部隊尾項徙去別位，又徙來還較多部隊。𠊎讀个小學後背就起一間兵營來安頓阿兵哥，還在市場脣一直到初中後背起幾下槓个兵舍，一兩年仔就毋罅歇，又再過在乾繭廠【焙蠶繭个工廠】後背到日本宿舍面前起加好多槓。
吾姆同莊項個个婦人家會㧡菜去兵舍賣，有兜阿兵哥个屋下人會做兜仔包仔、饅頭來賣，下擺仔就拿菜換包仔，有一個“太太”還教吾姆仰仔做。大家生活苦係苦，毋過已和挼。
這兜兵舍四十零年前總下拆淨淨來開大路，路脣个地主起販仔屋來賣。吾姆還在該下，𠊎兩子哀好多擺識講起這兜事情，佢道嘆講：正經愐毋解，做頭个人做麼个恁好鬥，總係愛㓾到分出輸贏。無論麼人贏，衰个還係百姓。
該個分部隊長打到半生死个細阿哥仔，該個在人浴堂項下世个嬰兒仔，係講這下還在，毋知愐得解無？
（四縣腔）彭欽清教授 聲檔 — 戰亂
