老妹个雞頦仔

【文、圖／張捷明／國立中央大學客家語文暨社會科學學系在職專班碩士】

 

　　八月半暗晡大家在禾埕焙肉，細老妹个手項揪等一隻阿哥歕个大雞頦，走上走下當歡喜。雞頦仔頂高畫等一頭油桐花樹，樹下有猴仔吊晃槓、𧊅仔唱山歌。

　　煙腸緊焙緊香，月光也在山背跋上來，細老妹顧看，看到忒入文，毋知煙腸好食吔，連雞頦仔也無揪好勢嗄來飛等走，等細老妹知著，嗄「哇！」一聲就噭起啊來。

　　雞頦仔飛過屋簷、飛過樹尾、飛到天頂，緊飛緊遠就毋見吔。

　　這個時節，月光堵堵跋上山頂高，大大粒明明亮亮。月光肚个嫦娥、張古老（一說吳剛）、玉兔、蟾蜍，當像正經在該無閒到捩捩轉。

　　細老妹毋盼得，緊噭緊大聲，阿哥聽著趕緊行過來，看等月光拐佢講：「你看，若雞頦仔既經飛上天頂高，恁大恁圓，分所有个小朋友共下欣賞，大家都會摎你講恁仔細。」

　　細老妹認真看，確實無差，雞頦仔頂高个油桐花樹、猴仔、𧊅仔，總下都在月光頂，就歡歡喜喜去焙肉吔。

　　今年，細老妹過一個曉得同人分享个八月半






　

▲BACK