Go！熱氣球愛升空吔！

【文／賴維凱／國立中央大學客家語文暨社會科學學系兼任助理教授】

 

Instagram @twentythirdnineteen

　　看著頭前起啊到恁猛个火，有人會著驚打卵退，有人嗄興撮撮仔行前去，熱氣球升空進前，最重要个就係火愛猛，火代表个毋單只係熱情，還有希望！

　　5月12，臺大行政會議通過學生會建議个「推動復振國家語言授課補助實施要點」，109學年度就愛實行，係全臺灣第一間跈等落實「國家語言發展法」个學校，起吔帶頭个作用。

　　先毋論裡背有幾多本身就會講客話、原住民話个教授，到時節會用「國家語言」來上課無，乜先毋去想著到時節有幾多學生仔做得接受抑聽仔識無，這都有方法做得解決。

　　中央大學客家學院係目前全國唯一有完整系所个學院，係毋係乜做得帶頭鼓勵先生用客話上課？帶動其他乜有客家相關系所个學校共下來推動？

　　熱氣球个火愛猛，氣流愛穩定，順等風向，有技巧个去調整，正使得吹啊心肚仔想去个位所，這下麼个都準備啊差毋多吔，大家愛共下飛上去過接近兜啊天頂千變萬化个雲還過七彩無？地泥下个人同你加油，乜想愛跈等飛上來。
　　
賴維凱先生 聲檔 —　Go！熱氣球愛升空吔！（南四縣腔）





　

▲BACK