亻厓所知个鍾肇政先生

【文、圖∕徐貴榮∕國立中央大學客家語文暨社會科學學系兼任助理教授】

 

　　5月16暗晡，電視播出「臺灣文學之母鍾肇政」過身个消息，心肝著一下大驚。鍾肇政先生過身，毋單止係客家界，也係全國文學界个大損失。

　　全國有名个文學作家鍾肇政先生，龍潭九座屋人，係客家大老，人喊「鍾老」，在臺灣文學作家中係第一個寫長河小說个人。有關佢一生人、文學作品、貢獻，關心客家个公共事務這兜，在當多地方都看得着，像圖書館、桃園客家事務局文學館、龍潭國小脣个鍾肇政文學生活園區都有展示。也有當多專家、研究者發表過，在這就寫兜有機會同佢請教个緣分，由這交談當中，也看得着鍾老平常時對人个態度同量度。

　　記得最早知鍾老个名係民國七十零年个時節，聽在四維國小教書个余清煥先生講，頭擺共下在龍潭國小教書个鍾肇政先生當慶，寫當多文學作品。在余先生个介紹當中，印象盡深个係「魯冰花」，故所該兩時在埔心，一聽講大明戲院愛放「魯冰花」个電影，就煞煞帶等一家人去看，當多人畀感動到跌目汁。

　　民國八十空年仔，有一擺，鍾老在中壢藝術館講「臺灣文學个發展」，演講結束，問佢有關「客家文學」个問題，吂知佢嗄回𠊎講「還吂有客家文學！」當時就當疑狐，明明鍾老寫个臺灣文學雖然用華語寫，寫个係客家地區个人文、歷史、地理，也算客家文學啊！仰仔鍾老會恁樣講呢？後來看《文學兩鍾書》正知：鍾老同南部文學作家鍾理和先生个討論中，有講着「愛抑無愛用客話寫文章？」討論結果，受限着當時个政治環境，在政府打壓本土文化之下，禁止方言，還吂解嚴，還係吂愛用客話寫文學，毋過從兩鍾个文章肚，還係發現着用客話个特色。故所，鍾老當時講个「還吂有客家文學」，怕係講「還吂有客語文學！」

　　民國88年6月，筆者教書个學校中壢高中家長會長盧孝治先生，當關心校務个發展，學生仔成績个進步，體念先生平常時个辛勞，免費招待先生，辦一個「科技文化之旅」。參觀埔心个合晶科技公司、龍潭宏碁科技園區，臨暗頭來到高原國小，鍾老早早就在該等𠊎兜吔！翕熱个天時，暗風吹來，聽佢講「寫作歷程」，一時嗄毋知熱吔！記得佢講：「𠊎讀淡江中學个時節，有一個歷史先生上課時，衫袋仔裡背長透袋等一本「夏木漱石」寫个小說《少爺》「衫袋仔書」（口袋書），係當時日本个「麻仔書」（麻疹書）。仰會安到「麻仔書」呢？鍾老講：「因為出麻仔係流行病，出過以後歸生人毋會過出，係處理毋好，引起天花，歸生人就面花花，影響一生人，嚴重个還會引起肺炎死忒，故所「麻仔書」就係影響眾人當深个流行書」。當時歐洲乜有一本「麻仔書」，安到「少年維特个煩惱」，這本書識在歐洲狂飆時代影響當大，毋過臺灣呢？還吂有看着。這本《少爺》係寫日本新時代同封建時代舊思想觀念衝突个書，歷史先生在上忒課伸着个一滴仔時間，就拿出來講分學生仔聽，分𠊎在寫作項當大个啟示。」演講个時間毋係異長，也無同鍾老講幾句話，毋過分𠊎得着一個新知識，更加瞭解鍾老寫作个想法。當時《鍾肇政集》係前衛出版社出版，盧孝治會長特別買來贈送分𠊎兜對文學有興趣个人，鍾老還親身簽名分𠊎（圖1）。恁有意義个旅行，轉來特別寫一篇「科技同文化之旅」，放到校刊項。

圖1 鍾肇政先生在厥著作「鍾肇政集」同𠊎簽名（1999.6.11）

　　欽佩个鍾老，一直無機會去拜訪。到102年个下半年，厥心臼（前立委）蔣絜安來上𠊎在中央大學客家研究碩士專班「客家民間文學研究」个課程。該年，筆者擔任臺灣客家語文學會个理事長，堵好12月在龍潭桃園客家事務局辦一場「語言同文學个饗宴」活動，想愛邀請鍾老來指導。就恁樣，由蔣委員引導拜訪鍾老。初次拜訪，鍾老就當細義、厚意，佢聽欸當歡喜，答應定著會出席。結果到舉辦該日，天時當寒，又落當大雨，冷風咻咻滾，鍾老還係由蔣委員陪等來參加。（圖2）

圖2 鍾肇政先生從開幕式到閉幕全場參加。（2013.12.15攝，前排左起莊育材先生、李漢銘先生、黃玉妹女士、蔣絜安女士、鍾肇政先生、徐貴榮、賴俊宏局長、黃科長、張慶惠女士。）

　　該擺个活動，開幕式過後，安排五場段落：第一場係「青少年客語說唱藝術表演」，由楊梅鎮瑞原國小古美珠先生指導學生仔表演。第二場係「耆老客語古詩吟誦」，請着讀漢書个李漢銘先生，中壢「以文吟社」个莊育材先生、黃玉妹女士，關西「陶社」个楊煥彩先生，佢兜全係80歲以上个年紀吔！用客話吟誦古詩。第三場係「客家三腳採茶戲曲演唱」，請來李勝波先生帶領个「桃園縣客家文化演藝推展協會」个會員演出「問卜」、「十送金釵」。第四場係「客語新詩个構思同句式對話」，請長透寫客語新詩个邱一帆同李源發兩位先生對話。第五場係「客家山歌小調演唱」請着陳盛喜、彭盛星、徐鳳和三個先生，分別就山歌子、平板、老山歌、小調表演。鍾老從開幕式開始到結束看到尾，同筆者講佢當久無看着恁精彩、恁有意義个客家活動吔！厥心臼講佢從來當少連續坐恁久看節目表演，可見當滿意喔！聽着過後，實在還感心哪！事後幾擺去看佢，鍾老都講愛煞猛打拚下去，客家正會有發展。（圖3）

　　圖3 鍾肇政先生同筆者講「愛好好傳承客家」（2013.12.24）

　　鍾老對人就係恁細義、厚意、有量度、牽成，分人尊敬。一生人在寫作文學當中，長透記等客家，長透講，無客家話就無客家人，這三十年來，客語文學有當大个發展，鍾老應該會較安心吔！在恁高壽還係拿等筆寫文章，係俚兜个典範。這下鍾老雖然登仙吔，分人悲傷、懷念，毋過佢个典範永久存在，文學作品世代留傳。
　　
徐貴榮教授 聲檔 — 亻厓所知个鍾肇政先生（四縣腔）





　

▲BACK