靚媸無比止 中意正慘死

【文／何石松】

 

　　有一隻令仔講：「一叢樹仔矮汀汀，紅花開來白花承；雖然人講𠊎恁媸，能夠蓋盡天下人。」佢介答案就係「棉花」。棉花介樹仔雖然恁媸，但是，佢介花能夠在天寒地凍介冷天，帶分天下人歸暗晡介燒暖，大家還係當愛佢。可見靚媸毋係問題，媸無一定係媸，愛看佢內心介靚，能深入了解佢介內涵能力，一定就會當中意。難怪人會講：「靚媸無比止，中意正慘死。」

　　靚媸無比止，中意正慘死，係講靚媸無論，中意等重要。意思在說明頭擺人討餔娘，毋係完全看對方介外貌靚媸，係愛看有中意無中意。再講，靚媸係無一定介標準，斯愛看兩儕係毋係有緣，係毋係看著合眼，能夠欣賞對方內涵，正會就像嗋鋼共樣，無辦法分開咧。

　　因為，逐儕靚媸介標準無共樣，所以歷史上介名人，像該流芳千古未卜先知介諸葛亮，斯有人講佢討介餔娘盡媸。

　　聽講，十七八歲介諸葛亮，戴在南陽臥龍岡，起一間茅屋，一片開山打林，一片打拚讀書。

　　臥龍岡就近，也戴等一個員外，安著黃承彥，當欣賞諸葛亮，常常去尋諸葛亮尞，諸葛亮看佢恁有學問，也對佢當尊敬。

　　黃承彥當想諸葛亮來做婿郎，斯請媒人去講親，諸葛亮識聽著風聲，講黃先生介妹仔當媸，所以諸葛亮無黏皮答應，也無拒絕，恁樣就宕下來咧。

　　以後，黃承彥來尋諸葛亮，斯談學問，毋敢講婚事。有一日，黃先生去尋諸葛亮尞介時節，就講：「你有聽過無？親戚朋友像牽鋸，有來正有去。𠊎輒輒都來尋你，你仰毋識來看𠊎呢？」諸葛亮當敗勢，講：「好好好，看哪日，𠊎一定來去尋你尞。」

　　諸葛亮決定去尋黃承彥尞咧。到了大門口，看門介人講：「員外特別交代，諸葛相公來，毋使通報，可以直接落去。」諸葛亮就向裡背行等落。看著第二進介大門關等，佢用手輕輕仔确一兩下，門自然就打開，行落去以後，門又隨時關忒。諸葛亮感覺當奇怪，無提防突然飆出兩條狗來，佢想愛退轉去，門又打毋開，該狗目瞋瞋ngongˋngongˋ滾緊吠，想愛躍等來，佢東閃西閃，閃到一身汗，無結無煞，好得裡背出來一隻梅香仔，摎狗頭那摸兩下，兩條狗就毋會動咧！梅香仔又扭等狗耳空，該狗就走落花園去。諸葛亮毋識堵著恁樣介事情，一半驚來一半好，行過去一看，嗄！原來該狗係樵頭做介。

　　諸葛亮繼續行到第三進門，目珠擘啊開，就有兩條老虎向等佢躍等來。佢想，這八成也係假介，就用手輕輕拍在老虎介頭那頂，無拍無恁死，一拍，該老虎嗄用兩隻後腳企起來，兩隻前腳把等諸葛亮介肩頭，擘開一張血盆大嘴，愛食人樣，該梅香仔遽遽走過來講：「你仰恁戆呢？用對付狗介方式對付老虎？嗯！」一片講，一片拍拍老虎介屎朏，老虎就轉到原位睡目咧。

　　諸葛亮試著當敗勢，就呻一下講：「愛落你這大瓦屋還難喔！」梅香仔講：「失禮啦，𠊎還愛去做麵呢！」諸葛亮目珠睇啊去，就看著廊下有一隻大磨石，一條木驢仔拉等磨石捩圓圈仔，像挨粄樣，諸葛亮看到發琢呆，非常欽服講：「哎呀，𠊎斯知黃先生學問大，無想著，佢還會做這兜奇奇巧巧介東西啊！」梅香仔講：「大老爺正毋會做這兜呢！」

　　諸葛亮心肝肚想，落一隻門，就有恁奇妙介事，又愛麻煩人，仰般正好？當在該遲疑時節，裡背一隻門又開咧，行出一隻面項有麻仔，身材高高介細阿妹仔，開容笑面問：「今日係麼介人客啊？」吂到梅香仔回應，諸葛亮就講：「喔！臥龍岡諸葛亮，今日特別拜見黃先生來咧！」細阿妹仔斯講：「請！」講忒就自家行落去咧。諸葛亮一個人嗄戆忒在該位，梅香仔就摎佢講：「你遽遽好落去啊！」諸葛亮正跈等行落去。又過了幾進門，轉了幾隻彎，正來到一位花開滿園介樓前。

　　黃先生看著諸葛亮來咧，就渡佢到樓頂。諸葛亮一心想愛知路上該兜東西，係麼儕做介，就講：「愛見先生無恁該啊！」嗄等講出落門來所堵著介事情。員外一聽，哈哈大笑講：「喔！該兜全係𠊎妹仔，食飽閒閒無頭路，在該搣東搣西，嗄摎你嚇著咧，真敗勢！」

　　諸葛亮聽了以後，嗄面紅漬炸，自家對自家講：「諸葛亮啊諸葛亮！你還糊塗唷！員外摎你講親，你還嫌人介妹仔恁媸！像這恁有才華介細妹仔，愛哪位去尋？」續等就對黃先生講：「小姐才智過人，𠊎實在敬佩啊！」黃先生應佢講：「𠊎妹仔生來恁媸，去摎人講親，人還無愛呢！」諸葛亮吂等員外介話講忒，就行前跪下去講：「今日學生仔特別來看岳父大人啊！」恁樣，黃承彥介妹仔就變做諸葛亮介餔娘咧。

　　聽講諸葛亮介神機妙算，木牛流馬，盡多係從厥餔娘該學來介。這正經係靚媸無比止，中意正慘死啊！

　　※此處的「介」為大眾通用的「的」，同教育部訂的「个」之意
　　
何石松 聲檔 — 靚媸無比止 中意正慘死（海陸腔）





　

▲BACK