茶・山行

【文、圖∕薛常威∕國立中央大學客家語文暨社會科學學系在職專班碩士】

 

　　這三隻字毋係唸做：茶山行「hong11」，應該係：茶・山行「san24 hang11」，店主人莊小姐本身屋下就係做茶个，講佢細个時節就趁等爺哀滿山走。「山行」就係講佢自小在茶山長大，在山肚種茶、尋茶个意思。這堵好摎杜牧个一首詩「山行」裡肚「遠上寒山石徑斜、白雲生處有人家」个意思共樣。



　　莊小姐本來在外國留學个時節，學个係企業管理。毋過佢想其實台灣个茶葉係通世界最好个，無分人知實在當打爽。故所2016年，佢在北台灣最大个茶葉產區龍潭這位開這間茶店，用佢自家个方式分大家知台灣茶原來恁好。除忒熱心摎人客紹介逐樣茶个味緒摎故事，摎恁好个台灣茶用輕鬆自然个方式展現，茶・山行這位乜有專業个茶道課程摎現代化个啉茶空間，啉茶个同時乜做得享用每日烘焙个手作甜點，在生活裡背肚，展現簡單、自然、單純个茶个美學態度。



　　茶・山行毋係單淨賣茶定定，乜一直有做摎社區共好个事情，舉辦「愛心串聯活動」，長透辦理逐項个藝文展覽、課程。店肚有一張圖，畫个係一欉「許願樹」，分人寫下願望貼上去，做得用自家个能力來分社區還較好，有人開教細人仔寫字个書法課，有人開花藝課，有人開課業輔導。𠊎第一擺去个時節寫下，「如何摎妥瑞兒、過動兒相處」，𠊎答應過這一場演講。



　　茶，算將就係摎臺灣客家人當相干个產業，後生个莊小姐利用茶葉、茶米、茶文化摎龍潭在地人，在地文化結共下，分共社區人个生活環境還較美好。
　　
薛常威先生 聲檔 —　茶・山行（四縣腔）





　

▲BACK