新約定舊俗成

【文／羅肇錦∕國立中央大學客家語文暨社會科學學系榮譽教授】

 

　　人類社會，為著對萬事萬物个認同同分別，盡基本个方法就係將各各無共樣个事物拿來分類安名，一樣東西一個意義一個符號。最先用个係聲音符號，再過來用圖畫文字來表示，不管聲音抑係文字，佢形成个過程，全部係「約定俗成」。新个約定變俗以後，就變自家文化个一部分，係講又堵著新个符號對本身生活有厥个需要，自然又會學這個新符號，來分大眾做新个約定。這就係語言詞彙形成个方式。

　　客人个祖先清朝初年來到台灣，當時講个話同原鄉个共樣共樣，梅縣一帶來个安到四縣，惠州一帶來个安到海陸。毋過，來到台灣，愛同占多數个學老人溝通，故所借當多學老話來用，這就係新約定，借來用久吔，就變自家語言个一部分，大家講該種話安到「客話」。像儘採、堵好、大箍、好額、食糜、糊糊纏、頭家、攏總、打拼、有影、無影、高不而將……，這兜學老話用久吔，毋記得係借來个，嗄恅著係大陸帶過來个客話。

　　共樣个道理，國民政府三十八年後，在台灣推行國語教育，歸個客家地區就煞猛學國語，早期借入異多學老話个客話，慢慢仔，又變到借入當多國語个客話安到「客家話」。這係新約定个「客家話」，同舊俗成个「客話」無論語音抑係詞彙，都有當大个出入，有兜新借來个客家話，正聽到該下，會雞麻皮會肨肨起。像灶下講廚房、風篩講颱風、人客講客人、有影講真个、共下講共同、日頭晒屎窟講太陽晒屁股、𢯭手講幫忙、屋下講家裡……恁仔繼續新約定下去，客話就毋多使推廣了。因爭下二擺个客家話同國語無麼个差別了，該愛使過花精神去搶救去推廣客家話、客家文化呢？

　　講到這，兜大概做得了解，客人來到台灣，借當多學老話入來新个約定，變自家个一部分，安到「客話」。三十八年，國民政府在台灣推行國語，又借入當多國語，變自家个一部分，安到「客家話」。既然「客話」同 「客家話」共樣，共樣係變忒當多个新約定語言，今晡日愛搶救「客話」，抑係愛搶救「客家話」，這係一個盡值得大家恬恬靜靜愐畀清楚來个大事情。還有，算來推廣客家話愛盡量利用國語學習个方便來教客話，抑係盡量保留傳統客家文化內容，教後生人講本質个正版个客話，正有文化傳承个意義。還過，企在學客家話越遽越好个立場，就愛大量採用國語詞彙用字來教學，正有辦法餳細人仔學客話。這兜拉拉雜雜个問題，係今晡日一等難決定个事情。

　　站在語言係「新約定舊俗成」个歷史規則或者社會現象來看，弱勢語言變化係擋毋核个潮流，愛在逆水滔天之中，保留若个氣脈，定著愛政府同民間配合，傳統同現代之間，有充分溝通，緊做緊看，緊行緊變腳步，正有辦法留下客話个特色，恁樣推廣客家文化，正有意義。
　　
羅肇錦教授 聲檔 — 新約定舊俗成 （四縣腔）





　

▲BACK