從豕字講起

【文／范文芳∕國立清華大學中國語文學系退休教授】

 

　　一.象形文字【豕】係描寫麼个東西？
1.最古老个漢字，愛回到甲骨文時代，用尖尖硬硬个筆在硬硬个龜甲、牛腳臂骨頂畫出一條頭大、體胖、腳短、尾短个畜生，今日个中文寫做「豬」，古文寫做「豕」。
2.初文【豕】發展出盡多漢字
3.屋舍中畜養豬，就係【家】，這係會意字。【象】係象形字，身材像大豬，頭前有長長个鼻公。
4.用利刃為雄豬切去核卵，就係【豖】，又可寫做【剢】。
5.用布巾蓋在豬頭頂，就係【蒙】。
6.山豬為保護妻小，會摎老虎打鬥，就組成【豦】字，客語遽翻譯為華語係快，翻譯為福佬話就係緊。
7.用利刃分解豬骨摎豬肉，就係【遂】字个右片半部，字形下頭係豕，上頭本來係分開个【八】，楷書寫成向內个兩撇。
8.人追豬就係【逐】，以上全係會意字。
9.有一個形聲字，從竹彖聲，就係【篆】，其中彖字本意係豬㓾好掛梁上，表音時，無愛字意，有緣份个【緣】同豬兒並無關係，分蟲兒【蝝】著，也摎豬兒無關係。
　　
　　二.有關客語字音
1.豕｛shii24｝家｛ga42｝豖｛dok5｝蒙｛mung55｝豦｛giak5｝
2.遂｛sui33｝逐｛giuk5｝篆｛chon33｝緣｛zhan55｝
3.從以上个字音，做得印證幾隻客語用字：
　　1.剢比剁理想 2.遽字音｛giak5｝3.追逐音｛giuk5｝
　　
　　三.從辭彙結構來看
1.豕本來就係豬，豬係後起字，結構係從豕者聲，家中畜養者稱豬，野外有山豬，另外還有一種豪豬，身上个毫毛係抵抗外來獵食者个防衛武器。
2.豚也係後起字，本指豬肉，從肉、豕會意，現代生物學有河豚、海豚之名。
3.用刀具刻畫、雕剢，有啄、琢等字，啄樹鳥、啄目睡、雕琢、阿丑琢係客語。
4.客語走相逐，走追兒，逐鴨兒都宜用逐。
5.客語常用个連接詞｛sa｝，【遂】比｛續｝合理。
　　
　　四.借生物學个分類觀念來討論客語用字
1.哺乳類動物中靈長目，有猩猩，台灣獼猴，雖然毋係犬科，算借用犬為部首。
2.哺乳類動物中食肉目，犬科有狼、野狗、家犬，狼、狗都用犬為部首。
3.哺乳類動物中食肉目，貓科有貓、獅、豹、虎，今貓簡寫做猫，猫獅非犬科。
　　
　　五.漢字筆畫之簡省，有利有弊
1.豸、豕簡化做犬，偏旁再簡化，今貓、狗、猿、猴、獅、狸、猩都同部首，但在科學觀念上，其實係有誤差。
　　

（海陸腔） 范文芳教授 聲檔 — 從豕字講起




　

▲BACK