高雄鄉音樂團

【文、圖／鍾榮富／南臺科技大學應用英語系講座教授】

 

　　時間實在還係遽，高雄鄉音樂團成立到今已經20年耶。團員本來都係2000年在民族國中客家語教學班个學員，全部都係國中先生，有教國文个，有教音樂个，有教英文个，嘛有教體育个，大家對客家話个教學都盡想愛了解，故所在百忙之中，來參加研習。每禮拜三朝晨三節課，對九點上到十二點。當時个校長係新埤客家人葉田宏先生，佢邀請亻厓來擔任研習班个教授。

　　研習班連續開了兩年，團員對28儕膨脹到38儕。除了一儕係河洛人之外(後來客家講啊盡流利盡正，參加全國比賽還得獎，今下在台南教書)，其他都係客家人，都曉得講客話，不過長久以來个習慣都在教室內講國語。這個課程對佢等來講，都係第一擺在教室底背聽客話上課，大部分學員感覺到盡生趣，盡有特色。更加趣妙个係學員雖然都係高雄市區个國中先生，平常堵到都講國語，無想著在教室內，正知各人个客家腔不同，有海陸、有四縣、也有大埔腔。亻厓自家講个係大路關腔，可能對大家有息把生疏，第一擺聽著還恅著亻厓講个客話無正版，後來經過介紹，大家正知台灣客家話有盡多種，慢慢个大家都學到尊重別腔頭个客家話。

　　研習班結束後，該時在鹽埕國中任教个林榮貞先生，愐著客家人相聚不容易，不如成立一個合唱團，一方面尋機會大家聚共下，另一方面使得透過合唱客家歌曲，多增加講客話个機會。就恁樣，成立了「客家鄉音樂團」，請亻厓擔任團長，葉校長做副團長，但係大小雜事都係榮貞先生打理。開始該下，大家都無經驗，好在有音樂先生來同大家訓練，學唱客家山歌。後來請到台南科技大學音樂系个教授，來同樂團訓練合唱、混聲合唱等技巧，又請佢个學生仔來彈鋼琴、小提琴。練啊練尼，竟然開始在高雄文化中心開演唱會，同時去北部參加比賽，跈等還去新加坡、日本、馬來西亞等地區同海外客家社團交流，緊做緊興。

　　五年前，改請葉校長做團長，繼續練唱比賽。到今，全部學員都退休了，有兜出國，有兜愛輔孫仔，能夠來練唱个學員漸漸少了。大家參詳以後，還係好好做一個完結，故所今年熄燈，結束鄉音樂團个練唱，將一切留分歷史。
　　
（四縣腔） 鍾榮富教授 聲檔 － 高雄鄉音樂團





　

▲BACK