虎帽金工

【文、圖／彭欽清／國立政治大學退休教授】

 

　　以前新竹橫山內灣該位个細人，「作對歲」个時節，老人家就會請銀匠打隻當靚个銀仔，連到細人戴个虎帽仔頂背，代表祝褔个意思。這算係內灣該片客人个傳統。早期个內灣因為斬木材摎開礦斯變到當鬧熱，所以該下正會有內灣个鐵路出來，毋過這幾年礦產開採緊來緊少，人變少，生理乜跈等變少，最尾變到後生人愛出外尋頭路。所以，內灣這種摎細人「作對歲」戴虎帽仔个傳統嗄漸漸無忒去。



　　吳界，摎內灣一群在地个後生人，想摎在地个傳統重新分人熟識，斯在內灣火車頭後背開間店仔，設立一个新个品牌，安到「虎帽金工」。照等先人挖礦尋寶个精神，用「虎帽」作象徵，來作有祝福意思个金工銀飾。

　　虎帽金工」有一間像宮崎駿電影个工作室，算係內灣最靚个打卡所在，人客做得在內灣這山肚旅行，乜做得做一日个山城銀匠，「虎帽金工」乜有銀飾DIY个課程，教大家、還過男女朋友共下來作自家親手做个銀做个紀念品。當然，大家乜做得摎頭家注文做耳環、䯋鍊該兜。



　　「虎帽金工」在內灣「好客好品希望工場」裡背肚，摎「台灣水色」黏共下，這兩隻品牌全部係內灣本庄个後生人為著故鄉成立个，毋係單淨想愛分內灣再過鬧熱起來，同時乜做得分在地个婦人家、老人家還有頭路好做，做得加減賺兜錢，幫助著本庄个經濟。
　　
薛常威先生 聲檔 —　虎帽金工（海陸腔）





　

▲BACK