榮興客家採茶劇團2019年度大戲《可待》觀後感

【文 ／ 麥楨琴、圖 ／ 榮興客家採茶劇團】

 

　　榮興客家採茶劇團今年推出新个戲齣―《可待》，係2014年後，原班人馬用心打造第二部跨文化个「客莎劇」。麼个安到「客莎劇」？「莎戲曲」係從莎士比亞戲劇改編，用真人扮演个傳統戲曲。係講用語言摎腔調做分類基準，在莎劇改編个客家大戲就安到「客莎劇」，在莎劇改編个北京戲就安到「京莎劇」。朋友問𠊎：無了解莎士比亞个戲劇，看得識「客莎劇」無？𠊎講：毋使有負擔，看著麼个就係麼个，輕鬆來看客家戲就著咧！

　　這齣客家大戲《可待》係從莎士比亞四大喜劇之一《皆大歡喜》改編个，時空背景係另外創作――「紫嬃國」摎「鄔酉國」（子虛烏有个諧音），鄔酉國戰勝後，紫嬃國遣嫁雪蓮公主，兩國議和。因為雪蓮公主毋想嫁，總係心頭拶拶，鄔酉王決定演出婚慶「祝釐戲」來分佢歡喜。在遴選各劇團个時節，雪蓮公主發現國王對從細共下大个梅劇團優伶心妍，一路里來有好感，毋過兩儕從無表達內心个想法。雪蓮公主就借戲說戲，在劇中寄託寓意，希望做得感悟鄔酉王。最尾雪蓮公主為著成全心妍个愛情摎自家个自由，向鄔酋王提出想收心妍做義妹，明年分佢用「紫嬃國公主」个身分嫁分鄔酋王做餔娘，呼應「皆大歡喜」个喜劇大團圓結局。

　　這齣戲一開始在舞臺頂垂吊幾十條當粗个白索仔，𠊎試著像係莎士比亞《皆大歡喜》原著裡背肚森林个場景，等舞者摎索仔拉起，成時重疊、成時纏繞，點出劇中主角束縛个心……。歸齣戲有六個分場，第四場〈觀情〉，用「戲中戲」个手法：觀眾看臺頂做戲，做戲裡背又有戲齣，前後有亂彈戲、歌仔戲、北京戲、樵頭戲摎客家戲个表演，分觀眾一下仔做得欣賞多樣个戲劇演出，𠊎感覺係這齣戲精彩个地方。第六場〈悟情〉，先安排當多个阿丑上臺，氣氛變到輕鬆起來，三儕阿丑反串蘇三、王寶釧、韓玉娘，臺頂个阿丑摎臺下个觀眾對話，阿丑講：這係虛擬个舞台哦！又問觀眾:一條索仔跌下來會變麼个？ 觀眾毋知，阿丑講：變石頭啦……，𠊎認為阿丑表演這段其實係用著三腳採茶戲个特色。

　　榮興客家採茶劇團个戲，音樂占當重要个部分，像一開始演出時，好聽个旋律用古箏演奏，將舞臺表現出悠悠个氣氛。客家大戲个唱腔，平板、山歌摎九腔十八調係定著有个，這擺還過加了亂彈戲、歌仔戲、北京戲个唱腔，逐隻就接到當自然。角色个音樂也有設計：像公主出來時會用古箏演奏、國王出啊來就係簫仔聲、心妍一出來係琵琶表現，劇團現場个樂器演奏水準嶄然高，聽起來就係欣賞一場音樂會。該暗晡扮演心妍个陳芝后小姐，除忒唱客家九腔十八調，無想著厥北京戲个唱腔乜唱到拗蠻靚、十分好聽。

　　戲煞棚咧！該暗晡欣賞這齣戲後，心肝肚當歡喜、異滿足。看得出劇團希望融合中西方跨界个戲曲表演方式，目標係激發出較多元个客家戲曲，所有劇團个人煞猛打拼，觀眾都有感覺著。毋過，較多个打拼乜愛觀眾个支持，支持就係輒輒去看「客家戲」，恁樣，「客家戲」這個文化藝術正做得繼續保存、代代流傳。（作者:麥楨琴，國立台北師範學院傳統音樂教育研究所音樂學碩士，目前服務於金龍國小並擔任新北市國教輔導團客家語輔導小組兼任輔導員 ）

三位小丑反串蘇三、王寶釧、韓玉娘劇照（榮興客家採茶劇團提供 ）

《可待》劇終皆大歡喜的劇照（榮興客家採茶劇團提供 ）

(賴維凱 聲檔 — 榮興客家採茶劇團 2019年度大戲《可待》觀後感 （南四縣腔）





　

▲BACK