木星上一個小朋友Email來信

【文、圖／張捷明／國立中央大學客家語文暨社會科學學系在職專班碩士】

 

　　地球小朋友大家好： 祝福八月半快樂。亻厓係木星小朋友，根據亻厓兜木星个新聞報導，今晡日係地球个八月半，乜係木星、月光、地球、日頭連一直線，47 年來木星離地球盡近个一日，距離大約五億九千一百零公里。為方便民眾觀測， 大紅斑市立天文館今晡日當晝決定，開放民眾入館觀測，熱情民眾尖適天文館觀測室，緊看緊講「還生趣喔」。 　　

　　天文館還特別交代，望眼鏡做毋得直接看日頭，雖然木星看著个日頭，比地球看著个日頭較暗較細粒，還係會傷害目珠。亻厓看過木星个新聞報導後，乜趕緊喊吾爸帶亻厓去天文館欣賞天文奇景。

　　確實有影，適木星个望眼鏡肚看地球，地球變成一粒細星仔，地球頭前有一粒月光，背景係一粒像電火珠恁大粒个日頭，毋過日頭毋係直接用望眼鏡看──係適目珠摎望眼鏡中間，再加一垤烏鏡片看，講恁樣正毋會傷害目珠。

　　天文台專業人員還特別紹介地球，講地球上過八月半盡生趣：

　　第一：家家戶戶都愛適月光下焙肉、食柚仔、唱月光華華。 
第二：地球正一粒月光，實際圓圓，看起來當大粒會變圓又會 變彎彎，一粒月光看一萬年都毋會懶，實在還生趣。

　　第三：還當多人為月光作詩、寫文章、編故事。

　　亻厓當想下二擺做得去地球摎大家共下賞月，毋過這下木星大空船還飛忒慢飛毋到地球。汝兜地球科學聽講當發達，無載人太空船適1973年先鋒10 號既經拜訪過木星，包尾先鋒11 號、航海家1、2號，摎尤利西斯號，也陸續來到過木星。新一代探測船伽利略號， 這下適木星軌道上，既經傳回當多極有價值个資料轉地球，下二擺係做得有載人太空船來，亻厓兜當歡迎汝兜來吾木星看亻厓兜个月光。

　　這下亻厓來紹介吾木星个月光分大家認識。第一，吾木星个月光係大夥房，總共有六十三粒恁多，像一個當鬧熱个小太陽系。有安名个有四十八粒，考試愛考月光名當難，背就毋起來。盡大粒有四粒，安到伽利略衛星，又分做木衛一、木 衛二、木衛三、木衛四，係地球天文家伽利略適地球年400 年前安个名。

　　木星上不管奈央時都有月光好看，日日都係中秋節八月半，故所月光故事特別多，有兜故事主角還會適這兜大大細細个月光頂，攀蘺吊璧飆來飆去，無堵好還會跌下來。過仔，寫月光故事定著愛 註明係第幾多號、抑係奈粒月光，係無，會張飛打岳飛──恅差代。 第二，吾木星个月光家族有行遽有行慢，有兜還會打卵退行， 看到目珠花啦必啵眼盲鼻花。

　　第三，吾木星个月光家族，有圓、有扁、有尖、有缺角，麼該樣式都有。

　　第四，吾木星个月光家族來源，聽天文學家講，係因為木星當大，比地球重 318 倍，肚笥做得放 1300 粒地球，故所重力當大，當多路過小行星，分木星重力拉著走毋忒，就變木星个月光家族矣，毋過，正確性還愛更深入研究。

　　恁樣，汝兜試著吾木星个月光家族有生趣無？歡迎汝兜來了解。 還有，係愛來愛注意準備以下要點：

　　第一：亻厓兜木星無硬地泥，大家歇雲頂高，故所愛先學會飛。

　　第二：重力當大，地球 1 公斤个書包仔會變2.37 公斤；體重係地球个 2.37 倍，100公斤體重，來到木星會變237公斤，故所愛先練身體。

　　第三：也因為重力當大，大家身材都武頓車搥，愛靚愛苗條个人愛先改變審美觀。

　　第四：木星當寒，溫度攝氏-130°C，愛著加兜衫。

　　第五：一日正十點鐘，故所愛早睡早䟘善用時間。

　　第六：一年有 4327 日，等過年當難。

　　 　　

　　紹介恁多，毋知汝有想來無，歡迎喔！正來尞。

　　　　　　　　　　　　　　　　　　　　　　祝，地球像木星，日日月光光，故事夜夜講無完。 　　

木星上一個小朋友 敬上　　　　
　　

張捷明先生 聲檔 —　木星上一個小朋友Email來信（四縣腔）





　

▲BACK