平鎮南天橋徐屋「生徐死吳」

【文、圖∕徐貴榮∕國立中央大學客家語文暨社會科學學系兼任助理教授】

 

　　平鎮有當多徐屋，打淨南勢這一搭仔就有三隻徐屋，本報313期有刊過「平鎮南勢南天橋徐屋五代中醫」一文。本文過來紹介脣項無幾遠仔，共鄰17號个徐屋（圖1），佢兜當特殊、生趣个係有一葩人「生徐死吳」
　　

圖1 上南勢南天橋17號徐昌祥派下老屋，正身老屋淋過紅毛泥屋
（101.09.15攝）

　　在生時節一隻姓，死忒又換一隻姓，一般較遽聽着个係西螺、崙背、二崙个詔安客人「生廖死張」，意思係講在生時節姓廖，過身欸就變到姓張，佢兜有厥特殊故事同來源。當少聽着北部客人有恁樣个情形，平鎮南天橋這隻徐屋就有恁樣个特殊故事同來源。

　　清朝乾隆55（1790）年，16世祖徐昌祥25歲个時節，從廣東省鎮平（這下蕉嶺）縣塹垣湖側角鋪，就係這下个黃田頭大下屋來台。因為徐昌祥初到這位，開發墾殖个人當多吔！就贌耕吳屋人个田地。徐昌祥人當煞猛、篤實，吂討餔娘之前，吳屋人分一个倈仔吳阿長畀做養子，後來吳屋人無傳，就將田地贈送分徐屋，交代愛分一个倈仔分吳屋傳宗接代。

　　來台祖徐昌祥在這耕田，到40歲正討餔娘姓廖，降傳永、傳遠、傳福、傳祿四個倈仔，為着感念吳屋人个恩德，就同大倈仔「傳永」个第二个倈仔「德成」過繼分吳阿長做倈仔，子孫生時姓徐，過身過後就愛姓吳，安到「生徐死吳」。故所，南天橋17號這隻徐家有兩個阿公婆神牌，吳姓祖牌放到徐姓脣項（圖2）。

圖2 徐屋阿公婆牌右片係吳姓傳下祖牌（101.09.15攝）

　　到今在廳下壁頂還貼等「來台祖昌祥公派下分支表」（乾隆五十五年民國前122年），盡右片在昌祥公四个倈仔後背寫等「吳阿長―養子過繼德成為嗣裔子孫生時姓徐死後承吳氏」。（圖3）

圖3 廳下壁頂个來台祖昌祥公派下分支表

　　嘉慶21（1816）年，昌祥51歲，因爭吳阿長个餔娘陳氏分附近个鍾屋人霸佔，告到府衙，雖然鍾屋人受着官府處罰，毋過經過兩年，徐昌祥單人獨馬經過寮仔窩个時節，鍾屋七、八兄弟在路項䀯等，一看着佢行過，好點點就七手八腳，刀棍亂打，打到歸身當傷重，險險消忒，好得自家有良藥在身，反魂正救生。因為家庭貧苦，也好得餔娘變賣屋下个東西，正有錢告到新莊廳衙，該七、八儕正受着官府个處理。故所，昌祥公在道光4（1824）年4月愛過身前，特別寫一份遺囑教示子孫，主要係同子孫講：將來絕對做毋得同鍾屋人對親，係有對親就毋係徐屋子孫；還愛煞猛讀書，毋讀書就愛耕田這兜。（圖4）

圖4 昌祥遺囑全文，收入《徐氏族譜》項。

　　 　　這隻徐屋四房人，還過「生徐死吳」該派人傳下，家族當大。後代子孫目前除忒在本居地个以外，大部分移到外縣市，有兜徙到獅子林去。（承蒙20世徐增強先生提供《徐氏族譜》參考、接受訪談）
　　
徐貴榮教授 聲檔 — 平鎮南天橋徐屋「生徐死吳」（四縣腔）





　

▲BACK