八仙過海 各顯神通

【文／何石松】

 

　　八仙過海，各顯神通，係大人細子都聽過介諺語。佢介故事當多種，意思也盡多。一般係講，八仙毋單淨本等高強，身上還有各種法寶，散發出當大介威力，能夠上天入地，騰雲駕霧；毋驚火來毋驚水，毋怕魔來毋怕妖。功夫無所不能，武藝無所不通。所以能夠通過該唬天唬地，大風大浪介東海，展現大神通。

　　八仙，根據民間傳說，有上八洞，中八洞，下八洞，還有各種介八仙。這位講介，係中八洞介八仙。八仙，就係身上有高強武藝，又能互相關心，互相痛惜介八種人，佢兜無職業高低之別，男女貧賤之分，共樣一體對待。該就係男女老幼富貴貧賤這八種人介代表。分別為男係呂洞賓，女係何仙姑，最老介係張古老，最後生介係韓湘子，等有錢介係漢鍾離，地位等高介係曹國舅，等貧窮介係藍采和，等低賤介係乞食鐵拐李，佢兜看破世情，深深體會人生價值，係愛儘量幫助他人。

　　所以，八仙之間，能夠互相牽成扶持，比論講鍾離權渡化呂洞賓，呂洞賓渡化韓湘子，又渡化何仙姑。再從八仙對人間介渡化來講，該就當多，像呂洞賓滿天下去點醒世人，鐵拐李葫蘆救世，何仙姑藥草救人，還共下摎人添福增壽等等，總希望大家過著和和捼捼，平安幸福介日仔，八仙過介可以講係茫茫人海，各顯救世神通。

　　聽講有一擺，八仙參加王母娘娘所舉辦介蟠桃大會，王母娘用千年難得食著介好酒來請人客，正經係「好酒千家醉，開罎十里香。」八仙個個食到酊昏飽醉，酒醉摸些，行路搖搖蕩蕩，偏來偏去；講話顛三倒四，迷迷癡癡。結果在回轉介路上，愛過東海，嗄堵著掌管東海介鯉魚仙子。一言毋合，就打起來，兩片打到翻江倒海，海浪噴天；天烏地暗，日月無光。

　　本來，八仙介通天本事，高強介武藝，不論行到哪位，可以講係所向無敵介。人間斯有講：「鍾離寶扇自搖搖，拐李葫蘆萬里燒；洞賓擎起空中劍，采和一手把籃挑；張古老人知古道，湘子橫吹一品簫；國舅曹公雙玉版，仙姑如意立浮橋。」看該鐵拐李介葫蘆可以普渡眾生，鍾離權介扇仔可以使人返生；曹國舅介陰陽板，來無影去無聲；洞賓寶劍，可以使出萬里風，劍現靈光神鬼驚；仙姑蓮花不染塵，還有法寶如意摎笊篱，像丹鳳舞空，法力無邊；采和花籃介奇花神果，可廣通神明，古老介漁鼓竹琴，能夠星相八卦，鼓出天外之音，靈驗生命。韓湘吹簫能捲起千層浪，又可使萬里風恬浪靜。一仙介能力，就不得了咧，何況係八仙共下還愛得？

　　但是，無想著，今日嗄堵著修煉千年，跳過龍門介鯉魚仙子，負責掌管東海。偏偏八仙又酒醉，經過這隻所在，可能酒後講話無禮貌，人講：「相罵無好言」，兩片嗄打起來。該鯉魚仙，本旦係鯉魚精，修煉千年，功夫高強，又知水性；手下千千萬萬介蝦兵蟹將，龜相夜叉，像蜂群蟻兵共樣，一群一群擠等來，該酒醉踉蹌介八仙，全無招架之力，就輸忒咧。

　　不過，聰明介八仙，黏皮知毋著，隨時回歸正道，人講「神仙打鼓有時錯，腳步踏差麼儕無」，大家還係非常尊敬八仙，常常念等「八仙過海，各顯神通」，係無上介光榮。

※此處的「介」為大眾通用的「的」，同教育部訂的「个」之意

何石松 聲檔 — 八仙過海 各顯神通（海陸腔）





　

▲BACK