戲文漢字个客家化

【文／羅肇錦∕國立中央大學客家語文暨社會科學學系榮譽教授】

 

　　客家戲劇演出，亻厓還細時節看个就淨「採茶戲」同「大戲」兩種。採茶戲係幾個仔做戲个人，湊湊揫來唱山歌、打採茶 ，還過搣兜仔笑科、 打兜仔拳頭、賣兜仔藥仔。歸場演出無一定个劇情，無一定个角色，連一丑兩旦也係一丑一旦，也無固定。故所，採茶戲係完全無劇本个演出。「大戲」係神生（神明生日）該下，無就當有錢个人做大生日，正會做大戲，大家正有戲好看，像收冬戲（平安戲），堵堵盡寒个時節，大家雖然緊看緊顫，還係愛緊顫緊看◦

　　這兜「大戲」早期同「採茶戲」共樣，無寫戲文，就聽戲班班主導演个彩棚，仰仔演仰仔唱全看主導人个安排。戲做完人群散，麼个都無留下來。該在早期竹林書局，特別將較輒演出个戲齣，用七隻字一句个形式，將劇情用七字韻文个方式寫出一齣一齣个戲文，出版好多仔閩南語廣東語个戲詩文。比較這兜戲詩文，除忒虛詞帶有客話、學老各各無共樣个用法以外，其他各戲文漢字學老同客家（廣東語）差毋多，比將學老話个《三伯探英台歌》:「杭州讀書三年滿，朝廷選賢去做官；滿學學生盡皆散，虧我三伯守孤單；三伯稟過先生聽，卜探英台秀才名；英台因厝不知影，全望先生說我聽；先生聽著笑咳咳，無影讀書做秀才；英台是共汝結拜，為何因厝汝不知；……」唱戲都用當時个台灣官話，結果當時台灣官話，同客人講个官話無麼个差別，故所這位用學老寫个「三伯探英台歌」歌詞，用客話去讀，除忒「卜是」客話愛講「愛係」，其他用客話去讀就像讀客話戲文樣仔◦

　　另外，尋加一本客家劇本《林月靈》，共樣選開頭幾句仔來比較：「從來盤古開天地，創造山河並地形；留下真龍浙江省，善菓根深得貴人；人說杭州地理貴，十個讀書九個成； 人人都要尋好地，積德當先自然靈；」「看倒美貌呵呵笑，就喊林生坐下來；我今喚爾無別事，看爾讀書幹真心；不久朝廷開科期，與爾參祥上京時。」這兜句語除忒「尋喊幹」係客話个特出用法，其他用學老來讀，同客話差毋多大家就聽得識。

　　比較以上兩段戲文个用詞，一般戲文寫做官人講話也係同神明講話，大約就係用文讀个官話來表現，存著演出對話該下正用口語客話來對話。這對早期無寫劇本个時代，當時演出个口語客話就無辦法記錄下來。結果戲齣演出个精彩客語對話就無用漢字寫出來，係當打爽个文化失落，該在，近年開始用客話創作，也做得用客話來寫劇本，故所做得從外台戲變到內台戲，做得在舞台照劇本演出還做得打出字幕，分毋會聽客話个人也做得來看客家戲。這係戲文漢字客家化盡大个貢獻，毋過戲文漢字化客家化，目前還吂當熟練： 戲文漢字用來毋的當、用來毋著个所在還盡多。寫劇本个人除忒愛客話講來流掠以外，還愛訓練漢字用法同語言運用技巧，另外吸收官話、學老話、原住民語、英文、日文个詞彙來靈活運用，也係今晡日寫客語劇本愛齊備个條件。

　　恁樣，正有辦法創作有水準个客家劇本，可見客家戲文漢字客家化，毋係當簡單个事情，有心寫客家劇本个人，愛對台灣本地各種語言都愛了解，同時運用個人个才華，將社會上流傳个各族語言，毋多知仔就轉化到客話，正有辦法寫出客家化个漢文劇本。
　　
羅肇錦教授 聲檔 — 戲文漢字个客家化 （四縣腔）





　

▲BACK