想像个生趣，生趣个想像

【文、圖／鍾榮富／南臺科技大學應用英語系講座教授】

 

　　想像中个世界最大，最闊，也最生趣。每一个人都有自家个想像世界，但係每一个人个想像無共樣，有人想上太空，有人想賺盡多錢，有人想去外國旅行，不管變化幾多，想像个共同點就係：想像中个世界總離毋開自家个生活經驗，這兜經驗有聽來个，有讀來个，也有親身經歷个。經歷加上想像，往往就係童話創作个來源。

　　頭擺，狄斯耐先生因為生活十分貧苦，連飯都食毋飽，歇个地方自然無辦法清淨，正會有老鼠來到佢書桌上揙東揙西，想愛拈兜東西來食。一般人看著老鼠，馬上想愛行去尋鐵鎚，無就大棍，想愛同佢𢫦死。但係狄斯耐同人無共樣，佢看著老鼠在書桌走來走去，跳上跳下，僅想愛尋兜東西來食。佢就愐著老鼠親像朋友共樣，會在佢落魄个時節，同佢同甘共苦。故所在佢心目中，該隻老鼠實在生趣，樣仔嘛盡得人惜。佢就想，愛仰仔正使得同老鼠變啊親切，讓小朋友看著會㖸、會同佢搞、會同佢做陣。故所狄斯耐先生就拿起畫筆，試了各種不同个樣仔，最後創作出米老鼠个畫像。狄斯耐有同老鼠共下過夜个經歷，加上佢豐富个想像力，結果寫出了風靡全世界个作品。

　　狄斯耐先生同𠊎等有麼个不同呢？大概仔講，係佢有童心，有純真个想像力，最重要个係佢有同情心。舉凡童話中个細鴨仔、細貓仔、細鹿仔、細兔仔、細熊仔等等能夠行入兒童个世界，引起小朋友興趣，帶來佢等个快樂，聚概都因為創作者對小朋友个眼光來看世界，底中个角色、對話、動作全部都離佢等盡近，對佢等相當熟悉。故所小朋友會感動，會有同理心，會去關懷故事中个動物人物。恁呢，小朋友變做故事動物人物个粉絲。

　　志寧校長長期在國民學校教書、兼行政、做校長，日常接近小朋友，對小朋友个動作、講話、行為等等觀察入微，開口自然帶有八分純真、兩分世俗，讓佢有本事創作童話。最重要个係佢自家在屋下畜鴨仔、鵝仔、魚仔，可能三不時就會同鴨仔鵝仔講話。講久了，自然知得鴨仔鵝仔个內心世界，也知得佢等个苦惱同喜樂。這本《長頸鴨》總共有二十四篇長短不一个小說，刻劃每一隻鴨仔，都非常鮮明清楚，篇篇精彩。有拗蠻个鴨公，有憨憨个鴨嫲，有單純个細鴨仔，也有奸雄个鴨仔。原來鴨仔个世界同世間人共樣，有惡心、有鬥爭、有懶尸有煞猛，有溫情，也有拗暴。簡單來講，這兜故事反映了作者同鴨仔鵝仔之間个對話，作者用文字來寫出佢等个想法同看法。每一篇个故事都有無共樣个寫法，每一篇都入味，你讀了一定毋盼得放下來。

　　特別值得推薦个，毋單係小說內容好看，最重要个係作者个客家話蓋溜，十分正板、登真，今下个客人盡少做得講恁順口个客話咧，莫講更加難得个係佢用寫个。有兜用字對平常个讀者可能過毋熟識，但係也毋會影響對小說个理解，因爭故事本身盡餳人看。係講讀者認識志寧校長本人，讀忒了這兜童話故事，可能還會提出疑問：這係佢寫个啊？

(四縣腔）鍾榮富教授 聲檔 － 想像个生趣，生趣个想像





　

▲BACK