高原社區發展協會个艾仔

【文、圖∕薛常威∕國立中央大學客家語文暨社會科學學系在職專班碩士生】

 

　　有妹仔莫嫁銅鑼圈，㧡水斯愛半晝天」，這係以前龍潭流傳个一句話，高原社區斯在銅鑼圈這，看得出該下高原係盡窮苦个所在。高原算將乜係傳統个客家庄，因為該片無恁多个肥田，故所早期主要係種耐旱个茶葉，做茶米為主，毋過背尾漸漸打毋過大陸較便宜个茶米，嗄緊來緊無生理，後生人變到愛出外尋頭路。高原社區發展協會个人斯開始想愛仰般活化自家个社區。

　　

　　「艾粄」係客家人當好食个點心，做艾粄最重要个材料就係「艾仔」，社區

　　个人想講其實銅鑼圈這片做得種出品質當好个艾仔，故所在兩千年開始，高原社區發展協會个黃玉琴理事長帶領社區民眾參與農委會个農村再生計畫，用「艾仔」來做社區活化再生个產業。艾仔其實係客家庄當平常个東西，尤其清明个時節愛做艾粄，艾仔做得避邪，在五月節，艾仔掛在門口會有精油个羴，做得趕走蚊仔，艾仔乜做得做菜煮來食。故所當地人摎艾仔講係「綠鑽石」。艾仔乜毋會當難種，歸年種得生，高原社區个艾仔特別用「無毒、天然」个方式來種。一開始社區个農民無愛信，毋過黃玉琴理事長當認真來做，當煞猛推廣，在假日市集裡肚，艾仔个產品緊來緊多人買。

　　


　　毋係單淨艾粄定，今這下，社區開發出當多艾仔个產品，有艾草香、安枕包、艾仔饅頭。社區个艾草產業，除忒推廣艾仔之外，還有照顧在地農民、提供住民二度就業，乜有摎利存轉社區，往社會企業个方向前進。

　　

　　高原社區也希望，未來做得再過發展艾草DIY、小旅行，來打造地方个特色。
　　
薛常威先生 聲檔 —　高原社區發展協會个艾仔（四縣腔）





　

▲BACK