海翁島个十三星淑女花蛄仔愛做新娘

【文圖／張捷明／國立中央大學客家語文暨社會科學學系在職專班碩士】

 

　　這係海翁島花蛄仔家族个大事，花蛄仔阿公發出喜帖分海翁島上所有親戚朋友、叔伯兄弟姐妹，喊大家來食酒。

　　[譯：]這是海翁島瓢蟲家族的大事，瓢蟲爺爺發出喜帖給海翁島上所有的親戚朋友、堂兄弟姐妹，邀請大家來喝喜酒。

　　

　　結婚這日，隔壁鄰舍打早就過來手，雞捋鴨舂粢打粄、擎桌擎凳無閒直掣，遠位个親戚也一路無停跎，愛來分十三星淑女花蛄仔請。

　　[譯：]結婚這天，隔壁鄰居一大早就過來幫忙，殺雞殺鴨做糕餅、搬桌子擺凳子忙碌不堪，遠地的親戚也一路沒停歇，要來讓十三星淑女瓢蟲請客。

　　

　　赤星花蛄仔(2)盡早到，佢帶等一家大細，遠遠飛等來，就像飛揚个一串音符，適空中牽等春風个手跳舞。大家看到戇忒，一直到停好勢正想著愛搭手歡迎，赤星花蛄仔送一籮蚜蟲(21)做等路。

　　[譯：]赤星瓢蟲(2)最早到，他帶著一家大小，遠遠飛過來，就像一串飛揚的音符，在空中牽著春風的手跳舞。大家看得著迷，一直到停下來，才想到要拍手歡迎，赤星瓢蟲送一籮蚜蟲(21)當禮物。

　　

　　第二到个係金背花蛄仔(3)，佢著一身紅禮服，烏色个靴仔，肩胛袈金色个頸圍仔，帶兄弟姊妹飛等來，分日頭晟(cangˇ)啊去，就像天頂个流星徙來徙去，對該彈天頂个大鋼琴，實在還餳(siangˇ)人。金背花蛄仔帶一擔葉蟬(31)做等路。

　　[譯：]第二到的是金背瓢蟲(3)，他穿一身紅禮服，黑色的靴子，肩膀圍金色的圍巾，帶兄弟姊妹飛著來，太陽照射下，就像天上的流星跑來跑去，在那裡彈天上的大鋼琴，實在好迷人。金背瓢蟲帶一擔葉蟬(31)當做禮物。

　　

　　三色花蛄仔(4)打第三，佢著等紅色个西裝，綠色个領結，戴等烏个帽仔，紳士又派頭。一屋下人，從對面山就山歌溜唱咻一路過來，這片會唱山歌个也另(nang)聲頦應轉去。一時間山歌滿山趖，鬧熱煎煎。三色花蛄仔送个等路，係一籮(gag‵)个介殼蟲(41)。

　　[譯：]三色瓢蟲(4)第三名，他穿紅色的西裝，綠色的領帶，帶著極黑的帽子，紳士又莊重。一家人，從對面山一路大聲唱著山歌趕過來，這邊會唱山歌的，也拚命用大嗓門應回去。一時之間滿山山歌來回呼應，熱鬧不已。三色瓢蟲送的禮物，是一籮筐的介殼蟲(41)。

　　

　　續下來到个係六條花蛄仔(5)、七星花蛄仔(6)、龜紋花蛄仔(7)....等等，一個比一個較靚，看到大家顧搭手喊讚，嗄毋記得係愛來食酒仔。

　　[譯：]接著到來的是六條瓢蟲(5)、七星瓢蟲(6)、龜紋瓢蟲(7).... ...等等，一個比一個漂亮，看到大家只顧著拍手叫好，反倒忘了是要來喝喜酒的。

　　

　　人客緊來，雞盤緊剁，八音響到滿山崗。拜堂个時刻到囉，大家圍兼來看鬧熱，雖然花蛄仔家族頸根短短，大家還係各人想辦法挷長頸根，愛看今晡日个新娘、新娘公。

　　[譯：]客人陸續而來，雞盤不斷剁，八音響得滿山崗。拜堂的時刻到了，大家圍過來看熱鬧，雖然瓢蟲家族脖子短短的，大家還是各人想辦法拉長脖子，要看今天的新娘、新郎。

　　

　　司儀開始喊講「主婚人就位，紹介人就位... ...新娘公、新娘就位... ...」

　　[譯：]司儀開始喊說「主婚人就位，介紹人就位.... ...新郎、新娘就位... ...」

　　

　　哇！還靚喔！ 十三星淑女花蛄仔著一身啾紅个新娘衫，頂高還結等十三粒烏个桑仔子，這係十三星淑女花蛄仔平常擔任農作物保母，守顧桑仔園手捉蚜蟲，得著个盡高榮譽獎。

　　[譯：]哇！好漂亮喔！ 十三星淑女瓢蟲穿一身極紅的新娘衫，上面還捌著十三粒極黑的桑果，這是十三星淑女瓢蟲平常擔任農作物保母，守護桑園幫忙捉蚜蟲，得到的最高榮譽獎。

　　

　　新娘公係大十三星花蛄仔(8)著一身淰(nem′)黃个大禮服，頂高共樣繡等十三粒烏个大號桑仔子。這對新人頭擺共下守顧桑仔園，盡負責任盡分人阿瑙(o′no‵)，倆儕對桑仔樹下談戀愛，今晡日總算結成公婆。

　　[譯：]新郎是大十三星瓢蟲(8)穿一身鮮豔鵝黃的大禮服，上面一樣繡著十三粒極黑的大號桑果。這對新人從前一起守護桑園，很負責任很讓人讚賞，倆人在桑樹下談戀愛，今天總算結成夫妻。

　　

　　續下來無人注意司儀講麼个，因為新娘恁靚，新娘公恁貼心，大家看到暈忒。包尾正聽著紹介人講「...倆儕因為互相欣賞對方高尚个人品、負責任个態度、體貼个性體，正來結為公婆，祝福雙方結為公婆後，共下牽手打拚，白頭偕老雙竹透尾。」

　　[譯：]接下來沒人注意司儀講什麼，因為新娘這麼漂亮，新郎這麼貼心，大家看到就昏頭了。最後才聽到介紹人說「...倆人因為互相欣賞對方高尚的人品、負責任的態度、體貼的個性，才來結為夫妻，祝福雙方結為夫妻後，一起攜手打拚，白頭偕老像一雙竹子有頭有尾、通透到底。」

　　

　　大家搭手祝福，又拿起蚜蟲糖漿互相敬酒，祝福新人一生人恩恩愛愛，乜祝福天下間个公婆，永久記得結婚个誓言、同眾人个祝福，永永遠遠。

　　[譯：]大家拍手祝福，又拿起蚜蟲糖漿互相敬酒，祝福新人一輩子恩恩愛愛，也祝福天下間的夫妻，永遠記得結婚的誓言、和眾人的祝福，直到永永遠遠。

　　

　　這擺十三星淑女花蛄仔个婚禮，又促成另外幾對个花蛄仔想結為夫妻，看起來真遽又有鬧熱好看囉。

　　[譯：]這次十三星淑女瓢蟲的婚禮，又促成另外幾對的瓢蟲想結為夫妻，看起來很快又有熱鬧可看囉。

　　

　　食酒个人客就寫一首新詩紀念：

　　淑女花蛄仔愛行嫁

　　喊大家分佢請

　　赤星花蛄仔

　　頭那項結蕊大紅花

　　拉等春風个衫尾

　　唱等山歌去食酒

　　金背花蛄仔也圍等金色个圍巾

　　跈等陽光

　　踏等輕快个舞步

　　愛看靚靚个新娘

　　人客緊來

　　雞盤緊剁

　　八音響到滿山崗

　　媒人帶等新娘新娘公

　　出來接受大家个祝福

　　哇！淑女花蛄仔還靚！

　　一身禮服啾紅

　　還結有十三粒𪐞烏个桑仔子

　　該係煞猛做事个乖細妹

　　盡好个嫁妝

　　媒人又帶等新人兜起蚜蟲糖漿

　　同大家共下乾杯

　　祝福新人

　　白頭偕老

　　雙竹透尾

　　大家又互相

　　祝福天下間个老夫老妻

　　轉去共樣恩恩愛愛到百二

　　

　　瓢蟲生態教學：瓢蟲暱稱農作物保母，喜歡吃蚜蟲、葉蟬、介殼蟲、…等，動作優雅、顏色鮮豔，暱稱淑女瓢蟲，台灣有兩百多種品種，全世界有五千多種，以下為台灣常見種的一部份

　　(1)十三星淑女瓢蟲

　　(2)赤星瓢蟲

　　(3)金背瓢蟲

　　(4)三色瓢蟲

　　(5)六條瓢蟲

　　(6)七星瓢蟲

　　(7)龜紋瓢蟲

　　(8)大十三星瓢蟲

　　

　　此篇瓢蟲的婚禮，具備音樂性、色彩、鬧熱、浪漫、溫暖、自然生態教學、瓢蟲種類食物知識，智慧的巧妙安排。

張捷明先生 聲檔 —　海翁島个十三星淑女花蛄仔愛做新娘（四縣腔）





　

▲BACK