平鎮南勢徐屋翹峨翹棟

【文、圖∕徐貴榮∕國立中央大學客家語文暨社會科學學系兼任助理教授】

 

　　平鎮有當多徐屋，打淨南勢這一搭仔就有三隻徐屋，本報313期有刊過「平鎮南勢南天橋徐屋五代中醫」一文，本文過再來紹介「南勢國小北片南華街經過南蒼宮無幾遠仔，對面巷仔落去，遠遠就看得着田中央翹峨翹棟个徐屋」（圖1）。

圖1 102年11月9日修建完成个14世徐華山公派下徐屋公廳（108.11.19攝）

　　一般人起个屋係無做過官，抑係無錢个人家，正身屋角大部分罕得做「翹峨」，有也僅可做一對，盡多兩對定定，毋過這南勢徐屋嗄有三對，這係一般客家建築當少看着个，可見當時徐屋个氣派。問講「當時仰會起三對翹峨呢？」管理人講：「起屋先生講恁樣較派頭！」論真起來，徐屋老祖公在春秋時代係諸侯做國王，到秦始皇个時節，有一個人安到徐福，秦始皇喊佢渡一千童男童女去海項求仙無轉，聽講走去日本，做日本个開國天皇，淨靠這風光歷史就做得做恁派頭咧！毋過歷史風光係歷史風光，現下較派頭又乜愛有恁樣个錢銀來起呀！

　　這徐屋个來台祖係14世華山公，佢在乾隆40（1775）年，同兄弟仔昆山、泰山從廣東省嘉應州鎮平縣（現下蕉嶺縣）黃田頭小徐屋過海來台，在南勢這下个位所開基創業，到今也有兩百四十零年吔！田園當闊，子孫發達，家族後代除忒在本地耕田墾殖，另外有一派，徙到大園、南崁去發展，還異多搬到外縣市去創業。

　　從上一擺66年修整祖堂以來，經過三十零年；當時兩片側膁同橫屋係日本時代到今，無共下修整，乜有百零年吔！看起來舊陋舊陋，蠟礙（lab ngai）蠟礙，強強就會塌下來吔，無定著哪久風搓一來，怕會畀擐走囉！（圖2）

圖2 原來正身公廳係民國66年農曆8月初9修整完成个，正身側膁同橫屋係大正11年修建个，起到翹峨翹棟。（99.12.19攝）

　　經過派下子孫開會參詳，決定大整修，除忒正身廳下該間維持原來个結構以外，其他兩片、連同橫屋，總下搉忒，照原來个樣仔，在102年3月仔重新用鋼筋「斯臘補」（混凝土）淋起來， 經過九隻月，到11月9日完成登龕安座。

　　新个公廳同舊个公廳比起來，除忒樣式共樣，有麼个無共樣呢？（圖3、4）新做个阿公婆牌以外（圖6、7），就係為著適應新个時代，細倈仔細妹仔共樣，男女平權，當多細妹人無嫁，在神桌右片做一隻「姑婆牌」（圖5），分無嫁个姑婆也做得入公廳。

　　
徐貴榮教授 聲檔 —平鎮南勢徐屋翹峨翹棟（四縣腔）





　

▲BACK