黃巢出世無爺姐，觀音出世無丈夫

【文／何石松】

 

　　黃巢出世無爺姐，觀音出世無丈夫，係講人生在世，多多少少有兜不足摎遺憾，𠊎俚毋好受著這不足介影響，愛行出積極向善介道路，正係最重要介。可比父子之愛，夫妻之情，係人倫非常重要介，偏偏黃巢無爺無哀，分人拈著做徠仔。觀音無老公，更無子兒，兩人介行為，嗄天差地別，影響也非常大。

　　其實，這句諺語係從〈海棠歌〉來介：「韓湘吹簫都妒都，鐵拐手拿寶葫蘆；黃巢出世無爺姐，觀音出世無丈夫。」人生價值成時係在於無介情況下打拚，無一定係在於有。韓湘吹簫係感念當年救佢性命介恩人湘竹，簫仔頂介空仔，係厥姆女英目汁滴穿空介；鐵拐介葫蘆，能夠使人反生，識救轉厥門徒哀仔介性命，全部係有一番銘心經歷，毋係為著逍遙快樂介。

　　所以𠊎俚愛仰般在無介情形下變做有，在有介情況下變為大愛，仰般跳出心肝頭介慍慍悴悴，變為海闊天空介千江有水千江月，萬里無雲萬里天。黃巢出世無爺姐，觀音出世無丈夫，係一種明顯介對比。黃巢係唐朝末年介人，因為，佢出世時節黃皮瘦骨，殗殗孱孱，像人畜毋會長進介樣仔，佢係厥爸在鳥竇裡背肚拈著介，所以安到黃巢。

　　佢雖然無親生介爺哀，但是，非常認命煞猛，在山頂練功又讀書，去參加三擺科舉考試，雖然考著當好，毋過主考官看佢生著恁媸，就無錄取佢。佢轉到屋下，越想越毋甘願，就想造反。毋堵好又摎該畜佢成人長大介阿爸㓾死，嗄變到歸身殺氣，滿遍㓾人放火。聽講佢東山掣劍，西山就有人頭落地，造成了「㓾人八百萬，流血三千里」介大災難，實在得人驚。

　　觀音娘，原名安到妙音，在民間傳說講佢係妙莊王介三妹仔，雖然有爺有哀，不幸介係，佢一出世就毋會講話，分厥爸掉在深山肚，愛摎佢害死，受盡當多災難，好得以後回轉爺哀身邊，厥爸又強逼佢招宰相介徠仔為駙馬，佢無愛嫁，甘願出家做尼姑，宰相又假傳聖旨，喊百雀庵介師太儘量糟蹋佢，苦毒佢，分佢受盡人間艱苦，自然會回轉朝廷，摎厥徠仔結婚。

　　無想著，妙音介意志非常堅定，毋單淨能夠忍耐萬般打擊，還在火燒百雀庵時，用自家介血變做天頂介紅水，救了五百零名介尼姑；又能用自家介存糧，救了三年天旱災民介性命，可以講係大慈大悲大善人。

　　雖然厥爸無幾惜佢，但在厥爸分五百零隻介蚊仔蟲仔咬著中毒會死，愛用親生骨肉介手摎眼，正能夠救得生，兩個公主都毋肯。好得分厥爸追走介妙音，犧牲自家介手摎目珠，救轉厥爸介性命，還毋分厥爸知，這種精神，實在了不起。

　　等到厥爸知著自家介性命，係三妹仔救介時節，就去蒼岩山尋菩薩，仰般都尋毋著，佢就喊起廟介師傅，塑一尊全手全眼介菩薩分大家敬奉。師傅聽毋著，摎「全」聽做「千」，就塑一尊千手千眼介菩薩，將錯就錯，更能表現菩薩介法力無邊。

　　觀世音一生都無丈夫，又無子女，但是佢能化痛苦為力量，化糟蹋為修煉，全力在該行善積德。佢識對玉皇大帝咒誓：世上係有一個人受苦，佢就毋上天庭。難怪長扯聽人唸：「天頂神仙算毋清，人間斯唸觀世音」。

　　同時，也有山歌講：「黃巢出世無爺姐，觀音出世無老公；人生在世愛知足，一切都在五行中。」

　　※此處的「介」為大眾通用的「的」，同教育部訂的「个」之意。
　　
何石松 聲檔 —黃巢出世無爺姐，觀音出世無丈夫（海陸腔）





　

▲BACK