借音毋使還大家共下用

【文／羅肇錦∕國立中央大學客家語文暨社會科學學系榮譽教授】

 

　　客話本來同北方漢語个差別，像天仔隔五里恁遠，該央時，客家祖先毋識字，毋會聽官話。官府个人就喊該兜人「山賊」，自從接受朝廷招安，登記戶口了後，就變良民，就開始納稅，開始讀書識字。背尾取得參加科考資格，就煞猛「晴耕雨讀」，追求功名，追求俸祿，改變身分。這毋識字个「山賊」就恁樣變到「客人」，平時講个土話，也就變到學來無麼正个官話，安到「客話」。

　　故所，今晡日客人講个客話，係長久以來，陸陸續續吸收該隻時代當地个官話，緊變緊變，變到今晡日大家講个各地客家話，淨台灣就有「四海大平安六」六个腔頭。這兜借來个字音，早期借个會同後期借个合等來用，慢慢仔，就產生兩讀个「破音字」。像「馬」字，本來講maˊ，後來多出文讀音个調仔maˋ，又像「動」這隻字，本來講ti tungˊ（地動），後來多出文讀音个調仔hangˇ tung (行動)。有兜借音係歸隻字音借來用，像「𠊎」借「我」來用，ngaiˇ就變到ngoˊ，「家婆」本來要讀gaˊpoˇ借學老个gieˇboˊ就變到 gieˇboˇ，寫漢字該下，應當愛本本用「家婆」正著，毋過，因爭字音差忒多，大家一時愕愕然。就請裁尋共音字來用，有兜用「假婆」有兜用「姊跛」，請裁拿相近个漢字來用，連面前用个「請裁」也係恁樣鬥出來个。其他像「爌肉」、「滷肉」、「落櫃」、「逐日」、「歸日」、「插漦佢」、「膏膏渧」、「降賴仔」、「風搓」、「嬰兒」…，這兜從學老抑係國語借來个音，全全就拿近音漢字來堵。這就安到臨時急及豬哥搭狗膦，當多字用到無崁無像，盡值得大家來討論，來修正。

　　像面前講个「插漦佢」「膏膏渧」「落櫃」「降賴仔」「風搓」「嬰兒」這兜客家用字，講老實話，一看就知，做毋得這樣過用下去了。尤其「插漦佢」个「插」字，會產生「𠊎毋插你」「你樣毋插人」等等同今晡日个國語用法差當多，毋了解个人，會恅著講猴話。還過「膏膏渧」「落櫃」就採用學老个「糊糊纏」「漏氣」將「糊」字加一個goˇ音，將「纏」字加一個diˇ音，將「漏」字加一個lau音，將「氣」字加一個kui音，用久了就會慣。這就係𠊎面前講个，這兜借來个字音，早期借个會同後期借个合等來用，慢慢仔，就會產生兩讀个「破音字」。

　　這係題目「借音毋使還，大家共下用」最基本个精神，拜託知這道理个朋友，好好來愐這个問題，樣仔來寫客家文，正毋會跔跔羞羞，遲遲疑疑，毋知愛樣般搣正好。

(羅肇錦教授 聲檔 —借音毋使還大家共下用 （四縣腔）





　

▲BACK