韓愈祭

【文、圖／鍾榮富／南臺科技大學應用英語系講座教授】

 

　　今年六堆地區个大事，就係十月二十八日在內埔仔舉辦个「韓愈祭」。「祭」實在係日本漢字，形同𠊎等个「節」，或者就係「活動」个意思。換句話講，「韓愈祭」就係紀念韓愈个活動。內埔仔係六堆地區之中，唯一愛用「仔」尾个地名，特別值得提醒，其他地名像麟洛、萬巒、高樹都使毋得加仔尾。同時，內埔仔也係六堆地區个代表，比論講教育部編寫个「南部客家語字典」採用个語音、詞彙、用法都係以內埔仔个腔頭為標準，可見內埔仔在六堆个地位十分重要。當然，內埔仔最有名个係有全國唯一个昌黎祠，係紀念唐朝時代个大文學家韓愈个廟。

　　韓愈實在講來同客家無麼个關係，佢在歷史上除了古文出名以外，其他也無麼个建樹，古文同客家完全無相干。不過，韓愈在古文運動中个地位高，連蘇東坡都講佢「文起八代之衰，道濟天下之弱」。人係出名，四周難免會攀親帶故。這正係韓愈同潮州个關係。

　　話講元和十四年（西元819年）韓愈反對迎佛骨，得罪了唐憲宗，俾下放潮州做省長(刺史)。當時潮州屬於偏遠地區，照佢講係「一封朝奏九重天，夕貶潮州路八千」。韓江水中有盡多鱷魚，聽講輒常還會興風起浪，浮出水面食人作怪，漁民同旅客苦不堪言，故所做父母官爺个韓愈，就準備了三牲同水果去祭拜鱷魚，為了讓鱷魚瞭解人民个痛苦，又寫了一篇「祭鱷魚文」，在上香祭拜以後火燒落水，祈求平安。這个動作帶分百姓十分感動，雖然後來鱷魚本本恁多，但係人民心中感念不已，韓愈離開潮州以後，百姓還係同佢起一間廟，奉祀香火。內埔仔早時屬於潮州區，可能該時對潮州移民過來个百姓之中，有人記得家鄉个韓愈廟，等到生活過好過以後，就糾同鄉親共下起了今下个韓愈廟，也係昌黎祠。因為韓愈蓋有文名，愛參加考試个童男童女，會帶等准考證來拜求好運，變啊一個特殊个現象。

　　客委會成立以後，在各客家鄉鎮尋有代表性个節日，做文化推講重點。內埔仔个代表就係韓愈祭。今年个祭典，同平時無麼个不同，神桌上擺滿了三牲、水果，最特殊个係一隻鱷魚，親像愛提醒韓愈對潮州个貢獻。祭典同時辦了客家打嘴鼓比賽，讓小朋友有練習客家話个機會。這擺參加个隊伍毋多，總共正14隊，但係重點毋係在比賽，係在提供場所同機會，分客家子弟有舞台，有觀眾，好好表現用客家話講古个趣味。

　　韓愈祭个活動，一方面紀念古代个文人，一方面協助推行客家話，變啊係盡有客家風味盡有特點个祭典，希望大家有閒來內埔仔行行遶遶个，包準你會有一个難忘个假日。
　　
（四縣腔）鍾榮富教授 聲檔 － 韓愈祭





　

▲BACK