克羅農場

【文、圖∕薛常威∕國立中央大學客家語文暨社會科學學系在職專班碩士生】

 

　　有食過彩色个糖果番茄無？2015年，臺大園藝研究所畢業个客家子弟何明昱摎一群後生人，成立了「克羅農場」，專門生產這種彩色个，像糖果个小隻番茄。 「

　　克羅諾斯」係希臘神話个農業神，這群後生人希望做得像農神「克羅諾斯」共樣，用佢兜个農業專業知識摎毋驚困難个精神，種下番茄樹苗，生到同人平高个時節，打子出一隻隻無共色个番茄，圍等青色个道路，就變成彩色个農場，「克羅農場」就係恁樣形來个。



　　以前个番茄單淨青色摎紅色定定，當罕得種出其他个色彩。「克羅農場」主要个產品就係彩色个糖果番茄。為著種出這糖果番茄，這群後生人在全臺灣調查天氣差毋多十年，看農場愛起到哪較好，最尾發現嘉義六腳係最合適種糖果番茄个所在。毋過，團隊个人毋係嘉義本地人，故所尋做得合作，做得起溫室个土地該下堵著當多困難，好得經過在地人个𢯭手正摎這農場起好。現此時，糖果番茄毋單淨當多色，當靚之外，逐種色彩个番茄味緒、香味、甜度也無共樣，非常合適送分朋友做等路。這下个銷路主要係百貨店、水果行，乜有賣到香港，未來打算進一步摎這臺灣个農產品推廣到國際。

　　「克羅農場」專心提供優良个農產品摎完善个服務，舉辦農場个活動，提高消費者个生活體驗，回饋社會摎做環境保護，放眼世界，追求永久經營。

　　雖然這下較少後生人肯做農事，毋過客家子弟何明昱確確實實經營出一間農場，乜有生產出當有特色个農產品，為後生人示範另外一條路。





薛常威先生 聲檔 —　克羅農場（四縣腔）

　

▲BACK