風中个月光

【文、圖／張捷明／國立中央大學客家語文暨社會科學學系在職專班碩士】

 

　　還吂食夜，老妹就拿等畫圖枋摎圖畫紙，坐適窗門邊等風中个月光。佢愛畫一幅盡圓盡光盡靚个月光，還有月光下阿公、阿婆、阿爸、阿姆、阿哥摎阿姊，一屋下人共下焙肉个畫面，想愛送分姐婆看。 　

　　舊年八月半，老妹跈阿姆去看姐婆，坐適姐婆个眠床刀脣聽講古。姐婆老矣，腳毋會行目珠又朦朦，總係適間項睡目，無就聽客家電視肚大大聲个山歌做伴，有外孫愛聽佢講古，盡歡喜。 　

　　該日，姐婆講起頭擺頭擺過八月半生趣个回憶，佢講頭擺生活苦，平常時毋單只無零用錢買糖仔，就算過年過節，理家个姐公太，乜還愛省省矣買。故所愛八月半到矣，正買一盒看起來還無月光大——餳細人仔流口涎水个月光餅。 　

　　該月光餅一盒正一隻，愛食還愛等姐公太頷頭，正大家坐兼來，看姐公太用菜刀一下一下切，一隻餅切做細細垤一兩十垤，一儕分一垤，正一細 口一細口慢慢矣嚐，食伸一息，還拿日曆紙包起來囥等鼻香過願。姐婆盡細，第一擺看著姐公太買月光餅就吵想食，姐公太講：愛等拜過月光正做得開。 　

　　姐婆就噭哆打扽屈，好得大舅公來拐佢講：「乖喲！毋好噭，阿爸係教，做人愛知感恩，故所愛先承蒙月光相惜，在暗夜中分光明，等暗晡夜先拜過月光後正食月光餅，月光餅會更香更加好食。月光盡惜細人仔，一定會阿瑙汝恁乖恁知人我喔！」就恁樣，姐婆下後就知講，只愛跈大家歡歡喜喜拜過月光，月光餅食起來就特別香。 　

　　姐婆又講起頭擺姐公太摎佢講个月光餅故事：『頭擺頭擺，百姓為著愛反抗壓迫佢兜个外族，故所將寫等聯絡信息个紙條，包入月光餅內肚，暗中聯絡大家適八月半食月光餅个時節，共同打倒外族。包尾成功後，適月光餅底肚放紙條个風俗就流傳下來，一直到當久當久。』 　

　　老妹聽著試著當生趣，就摎姐婆講：「這下細人仔驚肥，毋敢食忒多月光餅，顛倒八月半焙肉，比拜月光還較生趣。」姐婆講：「𠊎食矣恁老仰毋知？」老妹就摎姐婆約束，明年一定愛將八月半焙肉个新色畫面，畫一張圖分姐婆看。

　　食飽夜，老妹還拿等畫圖枋摎圖畫紙，坐適窗門邊等雨中个月光，阿哥阿姐準備風爐放巷路避風个所在，阿姆準備青椒、蛤仔摎魚肉，講較健康，阿爸陪阿公阿婆看氣象報告，電視報講辛樂克風搓近似停留，中心適宜蘭捩捩轉，通台都係風合雨，確定八月半無月光。 　

　　老妹當愁，無月光个八月半焙肉，愛仰般畫又圓、又大、又靚个月光分姐婆看？阿姆就教佢：「無雲就畫月光亮亮，有雲就畫月光雲縫囥，風風雨雨就畫月光放心肝。雲毋會永久遮忒月，雨毋會打濕明月光，有心向明月，明月就暗夜點明光。」

　　老妹雖然聽無麼識，佢還係拿起畫筆，畫出心中明月，佢想，姐婆目珠朦朦，一定係用心看月光。
　　
張捷明先生 聲檔 —　風中个月光（四縣腔）

　

▲BACK