中壢老街溪河壩風情

【文、圖∕徐貴榮∕國立中央大學客家語文暨社會科學學系兼任助理教授】

 

　　中壢有兩條河壩流過，日流夜流，街上人一溜里來就喊佢「河壩」。因為一條流過「老街」，安到「老街溪」；一條流過「新街」，安到「新街溪」。可惜這兩條河壩平平流過，直直到海無合起來，係無，中壢早就怕係一隻大都市囉！

　　老街溪在龍潭銅鑼圈東北个風櫃斗附近仔發源，順等店仔湖北片山排，流過龍潭陂、泉水空，平鎮山仔頂、北勢、南勢个合界，到伯公潭安到「南勢溪」。同西片另外一條在店仔湖岡背發源个大坑缺溪合起來，就安到「老街溪」。再到宋屋，穿過中壢老街、洽溪，到大園入海。（圖1）

圖1 過忒環北橋後流往大園个老街溪河壩（108.8.31攝）

　　聽講頭擺老街溪个水流當大，河壩異深，在大園做得駛船仔入來，到這下个中正路295巷落去無幾遠，安到「中壢第一街」，有碼頭上下貨，故所中壢第一街頭擺盡鬧熱，樵米油鹽、醬醋茶布、魚煙香火這兜日常生活个東西，應有盡有。生理人賺着錢吔就上去「豬埔仔」蹬蹬啊！消摸消摸！順等在這中壢第一街到中央西路一搭仔，安到「河壩脣」，也係以前中壢盡鬧熱个所在，有番薯市、賊仔市，河壩脣个柳樹搖搖擺擺，還有男仔人當愛去个地方。

　　當時歸條河壩个水，淨俐淨俐，有當多魚仔、蝦公好釣、好撈。到暗吔！夜鴰也會來參一腳，一夜恬靜又鬧熱。婦人家一早在河壩脣洗衫褲，東家長西家短，哪家豬嫲咬核卵；東沙短，西沙長，哪家心臼打家娘，該位就有當多「夜鴰」好聽。

　　毋知從哪兩時，氣候變化，工業發展，河壩个水緊來緊瀲，毋單止船行毋得吔，水也受着污染，魚仔、蝦公全部走去見閻王。無魚好釣，無蝦公好撈，無人敢去洗衫，到大約三十年前，毋知麼人个主意，將就歸條河壩揜起來做商場，垃圾臭羴看毋着就好吔！老街溪緊來緊屙糟，中壢嗄變到像一隻無人文个通俗都市。

　　經過十年个烏天暗地，好得到二十年前，商場開毋成，環保意識探頭，縣長決心整治老街溪，還分老街溪一個原來个樣貌，開始拆忒揜起來做商場个建築。恁樣，流過中壢个歸條河壩同頭擺灌溉用个興南堰（圖2）、新明堰正重見天日。還在源頭管制工業廢水，禁止排入河壩肚，河壩兩片疊起「壘石」工法，顯示客家流傳个石䃗文化（圖3）。在平鎮新勢公園下背設「污水處理廠」，處理老街溪上游流下來个污染水，在一入中壢个中原路下成立「河川教育中心」，展覽老街溪過去个生態樣貌，時時維護老街溪个清淨，魚仔慢慢仔泅轉來吔，夜鴰（圖3）也不時看着。

圖2 興南堰（108.8.31攝）

圖3 壘石工法―石䃗文化、河壩肚个夜鴰（108.10.11攝）

　　老街溪流到新做个翠堤橋（圖4）開始，就進入中壢區咧！經過中正橋、中興橋（圖5）、中央橋、新明橋，一直到環北橋，區內兩片全部做好人行步道、自行車車道，各隻景點位所也有講解牌（圖6）。逐條橋个設計都無共樣，分人感覺中壢有一份當有精神、當生活个都市樣仔。每朝晨、暗晡都有當多人在該散步、騎車仔，暗昏吔！在路燈之下，增加幾分仔个詩情畫意，同中壢化妝到靚靚。

圖4 老街溪進入中壢个第一座橋「翠堤橋」（108.8.31攝）

圖5 中興橋（中山路）樣貌（108.8.31攝）

圖6 解說牌（108.8.31攝）

　　順等這兩岸，有賣好食个美食、點心店，像菜包、豬腳、小炒、日本料理、咖啡這兜，想食麼个就停腳下來。還有一座「石爺」，係老街溪个救人傳說，想聽這傳奇，就在這石爺亭下坐下來，聽老人家講古。也有捷運站，交通利便，下二擺定著會餳得着當多人遶尞。

　　到這下來，老街溪个水雖然還毋係當淨，毋過魚仔緊來緊多，夜鴰、魚狗也轉來吔！不管好天落雨、朝晨暗昏，有當多人在這河壩兩片人行道散步、騎車仔，變成市民休閒健身个地方。毋過無人洗衫、無人釣魚仔咧！暗間仔也無欸！頭擺講「愛聽夜鴰，愛去中壢河壩」个情況難倒轉來咧！
　　
徐貴榮教授 聲檔 — 中壢老街溪河壩風情（四縣腔）

　

▲BACK