南斗注生 北斗注死

【文／何石松】

 

　　南斗注生，北斗注死，係講天頂介南斗星君決定人類介時生月日，北斗星君 能注定人類介百年歸壽；注定以後，就盡難改變。吾俚所有介生死日期，全部寫 在生死簿裡背。南斗負責生簿，北斗負責死簿，合起來就安到生死簿。

　　南斗，原來係天上介南斗六星；北斗，本來也係天上介七星。之所以變成掌 握人類介生死，係人類對天地星辰，三山五嶽，自然崇拜介星辰崇拜。自古以來， 就摎南斗北斗，變做大家尊敬介神明。因為北斗可以決定人類介生死命運，所以 盡多人希望能夠長命百歲，添福添壽，就會拜斗，所拜介斗就係北斗。

　　一般來講，北斗著白衫，較惡；南斗著紅衫，較善良。會過身介人，係講能 夠看得著南北斗，拜託佢添歲數，正經係千載難逢啊 ! 歷史上，正經就有恁樣 介人。

　　聽講三國時代，有個算命先生，安到管輅。有一日，佢看著一個後生人，名喊 顏超，氣色毋好，就講佢三日內可能會死。顏超轉去摎厥爸講，厥爸遽遽去拜託 管輅，看有麼介辦法來救厥徠仔無。管先生教佢兩子爺：尋隻卯日，準備酒水， 鹿肉一份，去南片桑樹下背，有兩個人在該打棋子，你就摎佢渟酒夾肉，飲忒過 渟，直直食到無酒無菜為止，係講佢問你，你就摎佢跪拜磕頭，毋好講話，一定 會有人救你。

　　顏超斯照管輅講介，在卯日前往南片桑樹下，正經看著有兩個人在該行棋仔， 佢就行前去兜出酒摎肉。該兩儕行棋仔行到當入文，無看著顏超，斯顧食酒。食 了幾下杯以後，北片坐等該隻人突然看著顏超，大聲咄佢：「你仰般走到這位來？」 顏超斯緊跪拜緊磕頭。南片坐介就講：「𠊎俚食介酒摎肉全係佢送來介，留兜面 子分佢正好啊 !」北片該隻人講：「毋過，生死文書已經寫好咧 ! 無辦法改啊 !」 南片該隻就講：「該借𠊎看啊仔好無？」

　　一看正知，顏超斯做得食到十九歲定定。就摎筆拿起來，摎十字頂高加隻九，就講：「分你食到九十九歲。」顏超歡喜壢天走轉來。管輅摎佢講：「這係分你最 大介幫助咧 ! 恭喜你能添福增壽。該北片坐介係北斗，南片坐介係南斗。南斗 注生，北斗注死。一個人係受姙懷胎，全部係先從南斗定好生日，正到北斗該位 定死日，一般人拜斗，全部係拜北斗介，因為北斗可以掌控人介生死。」

　　所以，自漢朝以來，就有拜斗介活動，求神降福、赦罪解厄，來益壽延年。 連孔明也識在兵營裡肚求拜北斗，係講主燈在七日內無烏忒，壽年就可以加十二 歲；係烏忒，該就無命咧 ! 可見北斗注死介法力。

　　目前在台灣，還有盡多人為了消災補運，求功名，開智慧，希望家庭和諧、 求平安，添福壽，也有拜斗介風俗。

　　南斗注生，毋單淨主控人介生，還當好心，為了人類介健康長壽，特別派了 俚所講介壽星——南極仙翁，下凡投胎，來教人類盡多介養生之道，該隻人就 係彭祖。彭祖，佢係中華養生文化第一大家，不論吐納導引之術，或者食療滋補、 長壽之道，樣樣精通。

　　但是，不管仰般養生，食到八百零歲，分人安到壽星介彭祖，還係難逃北斗 注死介命運，這係有生就有死介自然規律，也係南斗注生，北斗注死介意義。

※附注：

　　南斗注生 北斗注死：海陸音 nam deuˊ zhiuˇ sangˋ bed deuˊ zhiuˇ si

※此處的「介」為大眾通用的「的」，同教育部訂的「个」之意
　　
何石松 聲檔 — 南斗注生 北斗注死（海陸腔）





　

▲BACK