無嗣田

【文、圖／彭欽清／國立政治大學退休教授】

 

　　民國四十零年，當時个愛國獎券第一特獎係新台幣二十萬銀，該央時大體人就苦煎煎仔，一生人就怕賺毋著恁多。

　　亻厓讀小學四年生該年，隔壁莊个山皮仔項有儕人靠賣樵畜一屋下人。有一日樵較早賣忒，佢賭造化走去買一張奬券，半夜就無想著嗄分佢著著特奬。試想啊欸，全臺灣一期就淨一張第一特奬，愛著實在無恁該。大家聽著就講：還好福氣哪！

　　有了二十萬，自然毋使再過賣樵來絡食。有人還紹介佢去公館買一份平洋个田來耕，起間大瓦屋來歇。　

　　幾年仔過後，有人講著獎該儕人在公館無麼順序。有一日，吾姆同𠊎講，佢聽講該儕人買著人个無嗣田，毋單止錢了料淨淨，屋下人乜這病該病。尾項，佢千叮嚀萬叮嚀講：賺有錢係愛買田，定著愛買人淨淨俐俐个，絕對毋好去買人个無嗣田。當時根本毋知麼个係無嗣田，還恅著係「無恥田」。𠊎問吾姆田仰會無恥呢？佢正同𠊎講分明。　

　　無嗣，就係無後代。先民來到台灣開墾，日做夜做，下擺仔還愛同holo人過原住民相㓾爭地，千辛萬苦正挖出一坵一坵个田，無就愛咬薑啜醋，堅耐打拚半生人，正㘝有錢來買幾坵仔田，人講个：汗酸錢，萬萬年。總望這兜財產會有子孫來傳。

　　毋過，人會算，天會斷，有兜人吂有後代就來過身，有兜人歸屋下人仔好點點仔分天收拾忒，田地無人相續，這兜命換來个田就變到無嗣田。

　　田無人耕就會荒忒，有兜心肝較雄个人，就將無嗣田先占來耕，下後正拿去賣。民間傳說講，無嗣田个主人在地泥下目金金仔看等自家胚命仔開个的田分人號走，就開始去作躁耕無嗣田个人。聽講盡尾都會已悽慘，故所買無嗣田便宜加盡多。

　　原在人買屋買田，除忒愛開陽以外，還愛看地有淨俐無。這位講个「淨俐」係講無垃圾个東西。就係恁呢，墓地開挖出來个田地都較無人買，屋仔還較毋使講。無嗣田雖然毋係風水地挖出來个，乜算係毋淨俐，較仰仔便宜，知个人乜無幾多儕敢買，買个人大體仔係毋知總个外莊人。

　　無嗣田這個傳說係愛教精人毋好霸占別人个財產，毋好貪小利，篤實勤儉賺著个身家正藏得久。雖然講人無橫財不富，馬無夜草不肥，毋過乜愛知貪字頭，貧字腳个道理。

（四縣腔）彭欽清教授 聲檔—無嗣田

▲BACK