羅屋書院

【文、圖∕薛常威∕國立中央大學客家語文暨社會科學學系在職專班碩士生】

 

　　自桃園龍潭順等台三線向南行，兩片大抵係客家人分布个所在，雖然這下當多新起个屋，毋過零零㪐㪐還係看得到幾間當靚、當古早个傳統伙房，這兜老屋保存到盡好，比論講新埔姜家个天水堂，還過關西羅家个豫章堂。



　　豫章堂這間百年个三合院老屋，斯在關西石店子老街旁唇，行路就到。豫章係羅屋人个堂號，這幾年重新整理，另外安個名，安到「羅屋書院」，其實這個名係這幾年，地方文史工作者起个名，早期地方人喊做，河背大樹下新屋。

　　其實客庄這下還有當多當靚个老屋，後生人搬出去，嗄變無人戴，久兜嗄來舊忒、橫忒、崩忒。故所這幾年，緊來緊多人開始摎這兜老屋活化再利用，毋過大抵係整理過就改做景觀餐廳。「羅屋書院」較無共樣，這間老屋本來係關西羅屋家內个學堂，當有歷史淵源，摎一般个農舍無共樣，這老屋本身就有當多當靚，當生趣个雕刻摎圖騰。

　　書店主人羅仕龍本來在台北有一份當穩定个頭路，毋過佢想這老屋个未來到底愛仰般，緊想做毋得一直恁樣形下去，係無摎老屋活化，一定做毋得長期保存下來。最尾，佢辭忒頭路轉到故鄉，投入老屋改造活化个工作。

　　這下个「羅屋書院」毋係單淨辦各類生趣个文藝活動定，乜有提供餐點、分人過夜歇睏，老屋導覽。佢兜个願景係活化老屋，保存文化，帶動地方發展，創造共好經濟。這幾年緊來緊多關西出外打拼个後生人，走轉來故鄉，重新創業，羅仕龍就係其中一儕。

　　「羅屋書院」乜係浪漫台三線在關西个一個重要景點，大家記得渡細人來遊尞喔。
　　

▲BACK