楊梅武秀才李祥謹

【文、圖∕徐貴榮∕國立中央大學客家語文暨社會科學學系兼任助理教授】

 

　　楊梅國小左手析有一條透新埔个清水線大路，安到「秀才路」。大家講楊梅自古以來就無出秀才，仰會安到「秀才路」呢？故所有人講：清朝手欸有一個秀才從新竹坐轎過來，經過這條大路个時節，試着風光當好、當靚，就下轎來歇睏、坐涼、欣賞景致，留下「秀才行過个路」正安到「秀才路」。其實，楊梅在清朝有出一個武秀才呢！厥老屋就在這下楊梅國小禮堂附近仔，係毋係因爭恁樣，離楊梅國小近近仔這條大路，就安佢「秀才路」也毋敢話喔！

　　這武秀才安到「李祥謹」，字殿卿，清朝同治4（1865）年出世。乾隆初年，厥先祖李榮顯從福建永定帶兩个倈仔過海來台。淡水上陸過後，先到台北石頭溪三座屋開基（新北市樹林區柑園石頭溪三塊厝），後代正徙到楊梅來。李祥謹在清朝光緒18（1893）年，28歲就考着新竹縣武秀才个狀元，光緒時節，台灣當少武秀才，還過係狀元咧！做得講係「鳳毛麟角」，故所32歲分政府派做楊梅壢街長。（圖1）

　　

圖1 李祥謹、李金益父子遺照及李祥謹免楊梅壢街長令（明治30年10月7日）、李金益免楊梅庄長令（昭和4年11月28日）（拍攝日期：2018.05.09）

 

　　李秀才身高七尺，武頓有力，當愛練武，練武非常有耐心、決心、恆心。聽講後生時，逐日臨天光仔就䟘起來，無麼个風雨，騎等馬仔在屋脣後背（楊梅國小、國中、楊江里一搭仔）走來走去，練習跑馬、射箭。跑馬時節，單手將120斤重个大關刀擎到頭那頂劃來劃去，練習各種刀花。又為着鍛鍊雙手个臂力，喊打石師傅打兩粒長形个武石，一粒350斤重，另外一粒250斤重。練習个時節，雙手揢等石頭有凹个地方，再過慢慢仔扐高到胸前、頭那為止。

　　除忒一身个好功夫武藝，李秀才有擔當、有義氣，還精通詩學經典，醫學妙藥，在練武有閒時節，也同人看鐵打損傷、風濕酸痛、骨頭斷忒个疑難雜症，故所受到當多庄民个尊敬，在當時係一個傳奇人物。考着武秀才以後，就在這下个「武營街」教武藝，當時有當多後生仔聽着厥名聲，就來尋佢學武功，這股武力，一時也變到地方上保衛社區个力量。佢教武藝个這條街，後來就分人安到「武營街」，這下係楊梅當鬧熱个所在。

　　日本時代後期，日本人禁止台灣學武藝，李屋一時受着冷落，李秀才个倈仔同孫仔都無練武，係文人出身。倈仔李金益雖然連連續續鬥起來做兩任楊梅庄長，還過日本人庄長个助役仔（主秘）總下17年（圖1），李秀才練武个傢伙頭，像弓箭、圓形个武石這兜，當多毋見忒吔！正保存着該支120斤重个銅仔製大關刀，同合起來600斤重个兩粒長形武石（技勇石），放到老屋對面，厥息嫲李光益先生个廳下，變成李屋个傳家之寶。（圖2）

　　 圖2 李屋个鎮家之寶：120斤大關刀、兩粒武石（拍攝日期：2018.05.09）

 

　　楊梅上街、下街當久以來，就有鬧花燈、花車比賽个風俗，年年鬧熱。當時上街、下街个有名人物，在日本時代傳啊下來，就有「上八仙」同「下八仙」个傳說。李秀才个倈仔，也就係當時个庄長李金益還係「上八仙」个頭仔，可見李屋家族在楊梅地區影響力有幾大。

　　李家老屋在日本時代因為贈送分公家起楊梅國小，就在武營街脣買過地起屋，聽講起屋个材料係大陸運過來个，到今也有百零年吔！保存還算異好，根據過去楊梅市公所个道路計畫，武營街拓寬愛拆忒部分老屋設施，李屋後代為着想愛保存武狀元留下來个珍貴文物，在民國103年7月向桃園縣政府文化局申請維護保存老屋个完整，後來經過文化局古蹟會勘，認定當有價值，當時个楊梅市長彭聖富也表示研究變更道路計畫，正使得到今還完整保留老屋。（圖3）

　　 圖3 武營街个百年李家老屋（拍攝日期：2018.05.09）

 

　　李秀才雖然武功、醫術、擔當、做人全都恁好，毋過後生嗄來過身死忒，死忒个歲數同原因，還留一隻令仔分人揣。有人講36歲，有人講42歲，有人講44歲。死忒个原因有人講練武練過頭，練出病來；有人講有一暗晡去調解地方糾紛，分人請一餐夜轉來睡一覺長覺嗄無醒；有人講去省城參加武舉人考試，聽講愛貼手㬹，一閼啊去，大踢武石嗄內傷着。正確如何？厥後人也毋敢確定。

　　總講，楊梅這小地方做得出一個恁有名个武狀元秀才，實在無恁該。李秀才一生人个名聲，絕對毋係天頂跌下來个；天生武力雖然係有一息仔天份，毋過又乜係煞猛、耐心、勤勞練過來个。百過零年過忒个今晡日，毋單止係楊梅人，就係來楊梅觀光遊尞个人，聽着恁神奇个故事，又看到該支大關刀同兩粒合起來600斤重个練武石，過再看着壁頂掛等个相片，就像看着百零年前李秀才後生高大、武頓有力、騎馬射箭，舞弄該支大關刀个身影樣仔，忍無核就會勾起無限个想像同感佩，久久停毋下來。

　　（本文个完成，承蒙李秀才个息嫲李麗萍小姐引薦，李光正、李光復兄弟提供資料、解說）

徐貴榮教授 聲檔 —楊梅武秀才李祥謹（四縣腔）

▲BACK