有緣千里來相會，無緣對面不相逢

【文／何石松】

 

　　有緣千里來相會，無緣對面不相逢，係講有緣份介人，不管隔幾遠，經過幾多艱難，幾多辛酸，受幾多雕琢、委屈，包尾，還係能夠自千里之外，前來相逢，該係幾歡喜介啊！若係講兩儕無緣份，雖然就在眼前，也會無眼睇，無辦法相逢見面。

　　聽講頭擺有個忠臣介後代，安到陀滿興福，因為厥爸分奸臣陷害，滿門抄斬，好得佢有人暗中幫助，摎佢救出，逃到蔣家花園，分蔣世隆所救，結為兄弟，拿兜錢銀，分佢逃走。

　　這下，恁堵好係戰亂時節，金朝遷都開封，人民㧡擔牽子向南囥命。金朝兵部尚書王鎮奉命了解軍情，帶等夫人王氏摎妹仔瑞蘭共下南行，千軍萬馬介亂軍斯像蜂飛蟻趖共樣，一下仔兩子爺就失散忒咧。

　　王夫人無看著厥妹仔，緊在該喊「瑞蘭啊瑞蘭！」該蔣世隆介老妹瑞蓮，話著係厥哥喊佢，就應聲見面，續分王夫人認做義女。蔣世隆看著老妹毋見忒咧，也在該放勢牯喊「瑞蓮啊瑞蓮」，該王夫人介妹仔瑞蘭話著厥姆喊佢，就隨等聲音見面，吂知係蔣世隆，在兵荒馬亂之間，兩儕有了愛情，結為夫妻。無幾久，嗄發病仔，橫在旅館之中。

　　恁堵好，瑞蘭厥爸王鎮愛轉京城，經過旅館，遇著妹仔瑞蘭，又看著蔣世隆，嫌佢貧苦無錢，身上又著病，就毋認這隻婿郎，強強摎佢兩儕拆開，轉介路上，在驛站又摎夫人相逢，一家團圓。

　　瑞蘭跈厥爸轉屋以後，當想念老公世隆，逐暗晡都在庭前焚香拜月，求天公保佑世隆健康。後來亂事平定，天下太平，興福就去尋蔣世隆，共下進京趕考。無想著天公庇佑，兩儕雙雙考著文武狀元。王鎮奉旨招兩儕為婿郎，該就係蔣世隆摎王瑞蘭；陀滿興福摎蔣瑞蓮。相認以後，正知就係自家思念介夫妻。兩子妹見面、夫妻團圓，正經係有緣千里來相會，無緣對面不相逢。

　　也還有一種講法，就係有「緣份介緣」摎「猿猴介猿」諧音，一語雙關介故事。盡久以前，蘇州有一個富家千金，安到席盼盼，有一日，佢去廟項燒香，轉來時節，正發覺自家髻鬃項高介金釵跌忒咧，這金釵係佢祖傳之寶，所以馬上貼出告示，愛好好賞該拈著介人。

　　有一個廣東來介生理人，肩頭頂擎等一條猿猴，風神哎哎（ngaiˇngaiˇ），也來到這廟項，看著公告，本來無麼介注意，出來時節猿猴就交分主人一枝金釵。原來係該晡日，小姐介金釵勾在樹椏頂項，分猿猴抓著，拿在手上。該生理人就摎金釵送到席家還佢。席家人看著這後生人生來斯文幼秀，一表人才，恁老實，又吂討餔娘，就摎妹仔嫁分佢，當日就完婚拜堂。無想著，猿猴嗄猴性大發，走去灶下偷食，生理人一閼，就摎猿猴㓾死咧。

　　新婚之夜，新娘聽講金釵係猿猴拈著介，斯講：「女方媒人係金釵，男方媒人係猿猴，應該愛承蒙佢正著。」但是，新娘公講：「來毋掣咧，猿仔分𠊎㓾死咧！」新娘無幾歡喜，認為佢傷天害理，做積惡，恁樣介人，仰做得摎佢結婚？斯摎佢追走，講：「有『猿』千里來相會，無『猿』對面不相逢。」

　　※此處的「介」為大眾通用的「的」，同教育部訂的「个」之意。

何石松 聲檔 —有緣千里來相會，無緣對面不相逢（海陸腔）

▲BACK