茶園坪

【文、圖／邱一帆／國立中央大學客家語文暨社會科學學系客家研究博士班】

 

　　翻開南庄地圖
　　目珠金金看著這隻茶園坪
　　心肝肚想
　　該位定著有滿山坪个茶園
　　青溜溜仔个茶樹
　　嫩惜惜仔个茶葉
　　清風吹來滿山茶香味
　　
　　行上地圖項个茶園坪
　　看得著桐樹高高
　　看得著酸藤纏樹
　　還有歸片个野草遮塞塞
　　該難得看著个老茶樹
　　兩三頭孤栖企到該
　　
　　愐著頭擺
　　茶園坪頂滿園个茶樹
　　摘茶時節滿山个細妹人
　　戴等笠嫲 包等布巾 揹等簍公
　　輕手摘等兩皮一心个茶葉
　　歡喜唱等茶園情歌——
　　日頭一出上山坪
　　茶葉滿園嫩又青
　　摘茶阿妹心歡喜
　　一期摘過一期靚
　　
　　日頭一出照山坪
　　阿妹滿園嫩又靚
　　收茶阿哥心歡喜
　　一年收過一年青

（四縣腔） 邱一帆 聲檔 － 茶園坪

▲BACK