吳盛智

【文、圖／彭欽清／國立政治大學退休教授】

 

　　吾這綱仔人，大湖國小讀畢業過後，有好多個人考入大湖初中。故所，有兜同學小學初中加加起來共下讀九年。

　　吳盛智讀小學、初中都同𠊎共班，乜算已有緣。佢係大寮村竹篙屋人，𠊎係靜湖村上坪人，小學乙班个同學大體就係這兩村人較多，係大湖北六村个街脣村。初中个同學，有北六村个也有南六村个，還有外莊个獅潭、出磺坑、福基、雞隆仔這兜遠位个。

　　吳盛智个祖先係開大湖个頭人，竹篙屋个吳屋伙房出已多慶人。佢在學校个各種表現平平仔，全毋好搶光。同佢共下讀書恁多年，毋知佢聲恁好，恁有音樂才情。

　　讀小學仔有一年佢坐在吾面前，有一擺佢食當多柚仔，歸日仔打柚仔屁，一下仔就一粒，無聲个，等鼻著正撚鼻公撚毋掣了。坐吾隔壁个阿猴仔（吳兆紘）鼻啊著就講：又來哩哦。𠊎踢厥凳仔，看佢會較忍啊無，佢嗄顛倒斡頭來問：香無？ 算啊仔，該日佢總共打怕有百過隻臭屁。

　　初中畢業，大家各散西東。民國七十空年，在電視節目肚看著吳盛智唱歌仔，還當會彈吉他。同學大家就講無想著佢正經係恬恬食三碗公半，幾年仔無看著，嗄變到電視明星誒。佢係陽光合唱團个團長，唱英文歌為主，佢係主唱兼吉他手。　

　　雖然當無閒，佢還係會來參加同學會，會帶厥歌仔个卡帶分同學。有一年大家去阿里山旅行，兩日一夜，佢有去，同學請佢唱歌仔，佢清唱幾條仔，正式會唱。

　　吳盛智盡先在電視項唱現代客家歌，無論係〈無緣〉抑係〈醹膠膠〉，無就傳統山歌，佢用唱英文歌个方式來表現，聽起來已特別。佢同涂敏恆共下作詞作曲个〈𠊎係中國人〉，當合得著該央時國家个政策，故所盡多人知有這條歌仔，其實佢兩儕寫个係〈𠊎係客家人〉，當時還戒嚴，有關單位將「客家人」改到「中國人」正通過。

　　民國七十三年尾，有一日半夜仔接著黃豐宏同學个電話，講吳盛智車禍在臺大醫院急救，幾下個同學透夜趕到臺大，正知佢騎奧到擺愛出去食宵夜，嗄分人撞昏忒，送入加護病房。黃豐宏會長代表大家入去看，出來講佢歸隻頭那包包揫紗布，無其他个傷，全毋知人半息。尾項有聽講佢係無愛走秀場，分人謀忒。

　　佢過身過後無幾多年，臺灣就起勢本土化，客家語言同文化漸漸仔受著重視，盡多人唱客家歌。吳盛智係來食較長命兜仔，定著對客家音樂會有還較大个貢獻。
　　
（四縣腔）彭欽清教授 聲檔 — 吳盛智

▲BACK