青銀共煮X就是市集

【文、圖∕薛常威∕國立中央大學客家語文暨社會科學學系在職專班碩士生】

 

　　這一個特別个市集係張誠博士渡頭摎一群後生志工共下發起个，摎其他个社會企業無共樣，佢兜這市集並無固定个店面，顛倒轉來係滿位尋無共樣个地方，輪流辦活動。

　　張誠博士以前係台灣雄三飛彈个總工程師，退休以後斯開始做當多社會公益个事業，其中一個就係「青銀共煮」，青係青年、後生人，銀斯係白頭那毛，老人家个意思。最開始係張博士看著自家餔娘摎阿姆在廚房共下𢯭手煮菜，感情當好。該下斯想講，這下个時代愈來愈少人在屋下自家煮來食，後生人緊來緊毋知仰般煮食，老人家在屋下閒閒無事做，大家感情嗄來散忒。



　　摎後生人還過老人家喊來共下煮食，這斯安到「青銀共煮」，後生人準備材料，老人家手藝還好，知仰般煮較好食，乜知仰般正毋會打爽飯菜。今這下佢兜這群後生志工在中壢、平鎮這兩位辦當多場个「青銀共煮」，分後生人珍惜食物，老人家乜感覺自家還當有價值。



　　「就是」華語唸起來摎「救世」共樣，希望這市集像觀音菩薩共樣做得「救世」。張博士佢兜想講，台灣這下社會大部分个人算較有錢，較好額，物資當豐富，嗄變成大家較毋知好省，儘採打爽東西。這下社會環境變動乜當大，人摎人變較無感情。所以佢又成立這個「就是市集」，希望經過交換舊書，來分大家分享資源，分享愛。分大自家知仰般環保減碳，愛地球。大家多做一兜仔，俚生活个社會斯會無共樣。

　　張誠博士這群志工緊做緊快樂，這下當多係去逐個學校舉辦「反毒情境桌遊」，希望在遊戲當中，分後生人知講毒品對人个壞處，盡量毋好去接觸毒品。

　　希望佢兜个活動順順利利，影響愈來愈多个人。



薛常威先生 聲檔 —　青銀共煮X就是市集（海陸腔）

▲BACK