平鎮山仔頂徐屋大埔客

【文、圖∕徐貴榮∕國立中央大學客家語文暨社會科學學系兼任助理教授】

 

　　台灣个徐姓，講四縣个大部分係在廣東鎮平（今蕉嶺）縣來个，講海陸个大部分係從陸豐縣吉康都（今陸河縣）來个，少部分正係大埔縣、長樂（今五華）縣，平鎮山仔頂兼八張犁，中興路平鎮段路脣个徐屋就係從大埔縣來个。 根據手抄本族譜記載，還過大正9（1920）年出世， 19世徐新歡老先生（圖1）

圖1 徐新歡老先生（2013.9.4採訪攝影）　　

　　 圖2 山仔頂徐屋手抄本族譜

 

　　講个家族歷史，佢兜上祖英烈公原來在廣東省大埔縣赤水甲三洲坑个庵前崗開基（圖2），傳到13代徐玉韞、玉韜、玉倉、玉報四兄弟，清朝乾隆初年，在原鄉過海來台灣，淡水上陸過後，先到小基隆一搭仔絡食。玉韜公个孫仔15世大遠公搬到本區東勢庄開基，倈仔振榮公再過搬到龍潭八張犁个乳姑山下買山買田，起屋開墾，到今來台祖恁多兄弟个風水還葬在小基隆个錫板崗頂。

　　大約係日本時代大正13（1624）年个時節，乳姑山下个徐屋賺兜錢吔！就同林本源買着現屋跡脣38甲田地來耕。當年个林本源墾號，在大溪發達以後，勢力當大，當有錢，土地透到龍潭、平鎮、楊梅來，客家人自謙个時節就會講：「𠊎哪有錢？𠊎又毋係林本源！」無就教示子孫愛省儉个時節會講：「若爸斯毋係林本源喔！」可見林本源幾有錢欸！林本源變到有錢人个代號！

　　田係客家人个根本，有地就有財，故所客家人有錢就買田。經過煞猛打拚个耕種，徐屋到日本時代末期，家族个田產，除忒本來个龍潭八張犁以外，還包括山仔頂、北勢、安平鎮，連楊梅二重坑、矮坪仔這兜所在也有，最盛時節土地大約有百零甲。

　　16世振榮公降三個倈仔，振榮公過身過後，三兄弟分家，根據分鬮結果，長子抽到現居地兼龍潭个所在，目前總下就改建變社區咧；二房抽到八張犁舊公廳个地方，奉祀祖先；三子諸詳公抽到同林本源買來个地，結果諸詳公大約在昭和1（民15、1926）年開始起屋，到今有90零年个歷史吔。（圖3）

　　 圖3 徐屋伙房，面前還有一隻當大个陂塘

 

　　諸詳公降四個倈仔，因爭人口增加，陸陸續續起兩側膁个橫屋，慢慢仔變到左右各兩槓橫屋个伙房屋。到民國38年，將阿公婆分香過來，正身阿公婆神牌名除忒直系以上到來台祖玉韜公外，主要係諸詳公傳下子孫為主！（圖4）

　　 圖4 徐屋阿公婆牌，主要從17世諸祥公傳下，貼忒部分係還在世个。

 

　　 　　目前諸祥公後代，除忒在公廳伙房肚歇以外，無愛過起橫屋，跈等時代个脈絡，在附近仔起樓仔屋。可見徐屋人在這所在个旺盛，虎頭岡山下个大坑缺徐屋伙房也係佢兜个分支，連新竹客運个車牌名就用「徐屋」安名。（圖5）

　　 圖5 「徐屋」个車牌名，打爽在客家庄寫「徐厝」。

 

　　 　　徐屋个產業，早期除忒耕田以外，最主要係種茶同製茶，當時還吂有電，徐屋就自家買發電機，用機器製茶，賣到全台灣去。光復過後，經過耕者有其田、土地放領政策過後，田地少忒當多，後來製茶沒落，又再經過分家、賣忒，百零甲个田地伸無幾多咧！
　　
徐貴榮教授 聲檔 — 平鎮山仔頂徐屋大埔客（四縣腔）

▲BACK