自恨枝無葉 莫怨太陽偏

【文／何石松】

 

　　自恨枝無葉，莫怨太陽偏，係講一個人，經過了人生介酸甜苦辣以後，自家知好反省介得道之言。意思係：斯恨自家才德不足，無該介命，雖然有新衫新褲好著，也試著虐削；有鳳雞鳳肉好食，也會屙痢肚。錢財在身，還會了忒，唉，正經係自恨枝無葉，莫怨太陽偏。 　

　　聽講頭擺有兩隻乞食，一個安到枝無業，一個發臭頭介，安到太陽偏，兩儕感情當好，結拜為兄弟，常常出門去做伸手大將軍，滿遍仔去討食。 　　

　　雖然人講：「乞食斯愛三日過，三日一過，皇帝也毋做。」不過，事情愛想長想短，想頭想尾，係講長久下去，一生人做乞食，終久毋係辦法，做人講介「乞食仔掛紙——瀉祖公」啊，下二擺百年歸壽以後，愛仰般來見祖公呢？一想到這，怕做毋得繼續做乞食下去。 　　

　　所以，有一日，太陽偏摎枝無葉講：「吾俚乞食也做恁久咧，日仔也過著已做得，但是，長久下去，也毋係辦法，毋當吾理試出去想辦法做頭路，十年以後，共樣在這見面，不管結果仰般，也愛互相幫忙，你看好無？」枝無葉想想，也無其他辦法，兩儕就恁樣離開咧！ 　　

　　太陽偏單鳥仔一個人，一片行一片想，看仰般正有出頭天介日仔，無想著路上嗄突然落大水，又斷烏咧，人講：「臨暗雨，走較贏」，佢就遽遽尋一間大家下人介門樓前坐等僑水，順續看有麼介好分無？恁堵好，這家有錢人介妹仔，因為婚姻對象摎厥爸打無堵好，閼悴悴仔打包袱，準備暗晡夜就愛跈人走，太陽偏斯聽著「走啊，遽遽走啊」介聲，佢話著有人愛逐佢走，驚到尾瀉屎飆等斯走。一片走，一片聽著細妹仔喊：「好咧，毋好走恁遽啦！」佢試著奇怪，又喊𠊎走，又喊𠊎毋好走恁遽，轉頭就停下來，看係麼介事情。 　　

　　無想著，後背追來介係一個靚靚介小姐，走到當悿介樣仔，一片行，一片講：「等𠊎啊，毋好走恁遽啦！」等到細妹仔看著太陽偏，毋係自家愛跈佢走个人時節，一下就呆下來，問佢係麼儕，正知佢係乞食仔，正經壞蹄咧，跈毋著人咧，這下愛轉又毋係，跈佢走又毋好，心肝頭當艱苦，不過，看著太陽偏生著已斯文幼秀，毋會輸原來該隻講好愛來又無來介男朋友時，座令派，將就跈佢走好啦。 　　

　　兩儕慢慢仔行，行悿咧，想尋隻位所歇睏。恁堵好，看著一間茅屋，斯當有禮貌介愛借歇一暗晡，主人講：「無問題，不過這間屋閒當久，無人敢戴，你愛就分你戴好咧！」兩儕行落去，無想著，就聽著伯公對佢講：「太陽偏啊，𠊎等你十過年囉！愛摎這兜金銀財寶送分你。這有兩枝鎖匙，一枝金，一枝銀，可以開一箱金仔摎一箱銀仔，愛好好保管喔！」結果，正經發現裡背有當多介金仔。 　　

　　太陽偏發夢都無想著，一下仔斯變有錢人咧，毋當摎這間屋買起來。這屋介主人講：「這屋啊，頭擺無人敢戴，見落來介人就嚇死忒，你實在有慶呢，能夠平安出來，就將這間屋送分你好咧！」太陽偏無意無思就得到一間屋，正經暢到耐毋得。 　　

　　這下，兩儕有錢又有屋，無愁無慮，就決定愛結婚。因為，正來這生分介位所，毋敢揚鈴打鼓，大張聲勢介麻煩鄰舍，自家恬索索仔，斯煮一鑊嫲介雞酒來慶祝定定。無胚著，這香馞馞介雞酒，酒味嗄衝著茅屋頂介蜈蚣蟲，因為燒氣噴天，蜈蚣蟲斯跌落鑊竇肚。因為蜈蚣蟲可以清涼解毒，太陽偏介臭頭嗄好咧，變做一個斯文阿哥。 　　

　　太陽偏歡喜靂天，就摎茅屋拆忒，起過靚瓦屋，同時做六十一歲介生日，為了愛摎枝無葉見面，歡迎天下所有介乞食朋友全部來尞，毋使包禮。太陽偏目珠一直看向所有人客，愛尋枝無葉，一個一個認，包尾，正看著枝無葉頭犁犁行等來。兩儕見面當歡喜，太陽偏講：「毋好過做乞食咧，來𠊎屋下戴。」斯摎佢換新衫新褲，新眠床，新被骨。無想著，枝無葉無該命，新衫著啊落去就虐削，新褲著阿落去，就像有蟲仔趖樣，睡在新眠床，頭那會昏，蓋上新被骨，像會刺人樣，食了七日澎湃，七日都屙痢肚，姑不將，還係原來介衫褲較鬆爽。枝無葉講：「麼介金竇銀竇，毋當自家介狗竇。」 　　

　　枝無葉戴毋慣，愛走咧，太陽偏留都留毋核。無奈何，太陽偏為著分佢過著較好介日仔，斯準備五對包金仔介紅粄分佢，交代講：「這紅粄一定愛自家食，一定毋好分人喔！」枝無葉想著兩儕感情恁好，仰正分𠊎十隻紅粄定定，還講毋好分人食，𠊎挑挑就送人食。等送到斯伸一隻，打開來愛食時節，正發覺著紅粄裡背包介全係金仔摎銀票，哪係紅粄？這下正知差咧，舂頭磕額介講：「自恨枝無葉，莫怨太陽偏。」

　　※此處的「介」為大眾通用的「的」，同教育部訂的「个」之意
　　
何石松 聲檔 — 自恨枝無葉 莫怨太陽偏（海陸腔）

▲BACK