桐花同夜合

【文、圖／鍾榮富／南臺科技大學應用英語系講座教授】

 

　　有一擺去參加客家課本審查會議，內容牽涉到桐花同客家文化个關係。當時在場有七儕評審，都係對客家文化盡有研究个學者同校長，結果無一個人有辦法說明桐花同客家文化个關係。𠊎後來回想，南部客家問題座談當中，也輒輒有人問夜合同客家文化个關係。這篇短文寫出𠊎個人个看法，認為桐花同夜合都毋係客家文化个元素，因為這兩種花同客家人个生活無麼个關係。

　　每年五月邊，客委會都會辦「桐花祭」。進前，客委會就到位去宣傳，做廣告。電視、報紙有時會影著廣告，大小不一定。連機場也可以看著當多个推車，頂項印等「客家桐花祭」个活動廣告，可見客委會每年都發了盡多經費來辦這個活動。桐花祭該日，會場滿滿个人，台上官員賣力推銷，演講一場又一場，內容大部分講个都係客委會辦過活動个紀錄，無就係未來愛辦个活動計畫，但係永遠聽毋到官員講到桐花到底同客家人有麼个關係。不但恁仰，連參加桐花祭活動个民眾，也大概毋知桐花祭係客家人个活動。

　　實在講來，桐花本本就同客家人个生活無關係。當初台灣先民對廣東地區帶入油桐樹，主要係為了桐花籽使得做桐油，用啊在紙遮、船體、同其他工業設施个防水作用。後來，日本時代更加推廣桐樹个栽種，也係為了工業著眼。桐油經濟價值隨等化學用品市場个增加，慢慢失去了競爭力，故所油桐樹，不管係麼个品種，漸漸分人倒仔。今現下存下來个油桐樹，對北到南个山上都看得著，無一定愛在客家庄頭附近个山上。台灣油桐樹種類多，最少有四五種，花型多少有差別，共同點係樹仔高大，花白白，花期短。桐花樹種啊一大片，共下開花个時節，遠遠看起來歸山白雪雪，足滿好看。桐花一年可能開兩擺花，但係以五六月開个最多。

　　雖然桐花同客家人个生活無半點關係，但係經過客委會个推廣，北部客家人漸漸認同桐花。但係南部客家人，大部分都無看過桐花，故所對桐花完全無感覺。為了鬥鬧熱，南部有少部分自認為客家菁英个人士，透過高雄市客家委員會出錢出力，也積極推廣夜合花，希望客委會在認同桐花以外，也愛好好推廣夜合花。夜合，樹仔毋高大，屬於灌木類，花白色，毋愛盡大蕊，輒常愛日頭落山以後正開花，花期長，但每一蕊花兩三日就謝了。同桐花共樣，夜合乜毋係同客家生活有盡大个關係，故所推廣以後，毋會盡成功。

　　桐花同夜合都係本來同客家日常生活無麼个關係，雖然官方人士使力推廣，煞忙行銷，但係效果有限。文化實在就係生活，食封菜，歇夥房，敬伯公，毋識推廣，客家人自自然然就知得實行。自自然然知得，就係文化。


鍾榮富教授－聲檔－桐花同夜合

▲BACK