三腳仔──上坪个古

【文、圖／彭欽清／國立政治大學退休教授】

 

　　阿仁哥生來人高馬大，頭大面四方，毋過正單支腳，行路愛靠兩支怙杖仔。

　　佢單身哥一儕歇在一間亞鉛餅搭个矮寮仔肚，同人黏錫來賺食。該央時逐家屋就會用着幾下隻錫桶，用壞忒就會拿去畀黏，故所厥生理罔罔仔。

　　阿仁哥朝晨暗晡會來過家尞，異有講。下擺仔佢無來，有人就會問：「三腳仔無來？」「跛仁仔呢？」乜有人會開始講厥曆晒。

　　阿仁哥會分人安到「三腳仔」，毋係佢單支腳，愛用着兩支怙杖仔，係佢做日本兵該下做班長，當猴，當會欺負臺灣兵。臺灣人同日本人看做係狗仔，講日本人四腳仔，同日本人𢯭手欺負臺灣人个臺灣人安到三腳仔。

　　阿仁哥係河頭人，係大姓人家个子弟，做日本兵去到海南島，當會欺負臺灣兵，等日本一投降，分佢欺負過个人，毋放過佢，逐佢逐到海脣，摎佢圍着來，同厥大腳髀刓下來，聽講該兜人起先還不准人去救佢，愛畀潑血潑到死，尾項共莊去做兵个人千求萬求厥命正拈轉來。

　　等佢轉到河頭，不時有其他識畀欺負過个人，走來河頭愛尋佢輸贏，迫到佢無法，正會徙來上坪歇，愛過年過節抑係厥房頭內人有做好歪事正會轉去。

　　吾姆講，上屋个清德仔做日本兵該下在海外乜當會欺負臺灣人，日本投降該下，日本人送轉日本，臺灣人送轉臺灣，幾下擺有人尋到莊項來愛尋佢報冤仇，看着佢擔着痰火，人殗殗，毋會做，愛靠餔娘子女賺來食，正放過佢。

　　故所吾姆教𠊎兄弟仔，做人愛𢯭仔着个盡力𢯭，定著毋好去欺翕人，係無，會像阿仁仔同清德仔樣仔，日仔過來異悽慘。

　　

彭欽清教授 聲檔—三腳仔—上坪个古

▲BACK