一起灶

【文、圖∕薛常威∕國立中央大學客家語文暨社會科學學系在職專班碩士生】

 

　　以前，新竹竹東火車頭出來个左手片，係一片當舊个鐵路局宿舍，當無意思，連竹東在地人就毋會想愛去該所在。毋過在2017年12月，新竹縣政府摎這片所在重新整理，變成「竹東文創藝術村」，分後生人來這片創業打拼。這下，續變成當好尞个所在，幾下間當生趣个店仔，餐廳在這位開始營業，像 「舊事生活」， 「853泰雅農市集」，還過「一起灶」。

　　《一起灶 A SPACE》係職人摎旅人个交流空間。創辦人之一个黃瑞仁先生其實係一個大學个講師，佢摎幾個朋友整理出這隻所在，安到「一起灶」，「一起」 華語係共下个意思，「灶」 係灶下，係廚房，係一個空間。大小朋友在「一起灶」 這個空間，共下啉茶食飯、共下摎職人學手作、共下做空間个策展。幾個創辦人个夢想係在經驗累積个智慧裡肚，共下幫大家打造自家歡喜个生活。




　　比論講，像上擺五月个母親節，這片使有請先生來教大家手做三寸金蓮鞋包，送分媽媽。做得自家做一隻，無斯摎媽媽共下做，分媽媽母親節快樂。

　　想著後生人創業辛苦，無恁多个資本，無能力自家開一間店仔。還有當多人雖然有夢想，毋過平常時還係愛上班。「一起灶」 提供一個共享个空間，來降低屋稅个成本，好唱歌个人，做得來這位表演，係有特別手藝个人，乜做得在這教別儕，無斯摎自家手作个手工藝品放到這寄賣。乜有當多竹東本地人，摎自家个農特產品放到這賣。

　　在「一起灶」這位，職人創作可能，旅行个人尋找精彩，共下打造自家歡喜个生活方式。


薛常威先生 聲檔 —　一起灶（海陸腔）

▲BACK