蟾蜍愛去選美

【文、圖／張捷明／國立中央大學客家語文暨社會科學學系在職專班碩士】

 

　　蟾蜍愛去選美，佢行當慢，去到舞台仔已經開始表演。

　　𧊅仔細隻流掠1著一身青衫，先唱一首小調山歌gua～gua～～gua～～～，又換唱「哥愛連妹聲愛開2」，會唱會跳人又靚，台下个細阿哥仔看到暈忒。第二上台个係蛤蟆，佢一身高大，著灰色个西裝，生來緣投聲頦又靚，一曲山歌子，唱到水都會顫3，大家聽到呆忒。第三儕輪著蟾蜍上台，佢著暗色獵裝，唱一條本旦盡好聽、盡有搭碓4个老山歌。毋過，聲頦濕濕5聽毋真，當打爽，無人搭手。

　　第一回比賽結束，蟾蜍打盡尾名。

　　第二回才藝比賽，𧊅仔表演食蚊仔，一開嘴一隻一尺遠个蚊仔就食落肚，大家緊搭手喊慶。輪著蛤蟆，佢也表演食蚊仔，連腦之背6三尺遠个蚊仔都飛毋過詐7，大家搭手搭到手軟忒。再輪到蟾蜍，佢還係表演食蚊仔。正一開嘴，一隻丈二遠个蚊仔就嚇到拉尿，遽遽講：「蟾蜍大哥，請毋使恁費氣，你只愛嘴打開，𠊎會自家飛到若嘴空肚分你食就好。」這擺嗄無人搭手，因為大家佩服到呆忒，嘴擘大～大，等五分鐘久正開始搭手，搭到大家个手腫起來。

　　第二回比賽，蟾蜍盡厲害。

　　兩輪比賽，拖勻8起來大家無輸無贏，只好加比一項特別能力獎。𧊅仔同蛤蟆提毋出麼个特別表現。輪著蟾蜍講：「𠊎有割肝救人个精神，還有自我療傷个能力9。」大家聽了後一致同意，這擺个選美比賽，蟾蜍打第一。

　　

張捷明先生 聲檔 —　蟾蜍愛去選美（四縣腔）

▲BACK