埔心个過往今來

【文、圖∕徐貴榮∕國立中央大學客家語文暨社會科學學系兼任助理教授】

 

　　「埔心」這隻地名，台灣有幾下隻，較有名个怕係楊梅个埔心，因為車頭北片無幾遠仔有一個「埔心味全觀光牧場」，餳着當多人去尞。

　　楊梅个埔心，本來係一大片个荒埔，因為有一隻草生到淰淰个濫泥大陂塘，大家安佢「草湳陂」。昭和3（1928）年，日本人在這起个小學就安到「楊梅壢公學校草湳坡分校」（日本時代將「陂」寫到「坡」）。 這一搭仔地勢高崗無水，清朝時節還無幾多戶人家。聽講在四維國小附近仔有一個姓羅个人家，靠一口大約五、六分仔大个「昂天湖」來灌溉，耕田絡食。日本時代，人口慢慢仔徙落來，識挖幾口仔陂塘來蔭田，毋過長透水溓溓，在下晝頭夕陽照啊過來，同陂塘䃗、陂塘底个紅泥，映到紅噹噹仔，故所人講這兜陂塘安到「紅陂仔」，到這下埔心發展起來，哪仔就起屋起淨淨吔，全看毋着半息魂影咧！

　　早期埔心西片个頭重坑，係淡水廳竹北二堡從北算起來个第一條河壩，故所官方安到「頭重溪」，從這到「草湳坡」，就安到「頭重溪庄」，過忒頭重坑，就係桃澗堡（今桃園、中壢）。乾隆期間，來楊梅開發个人，正到頭重坑定定，還吂到草湳坡來。光緒20（1894）年，劉銘傳做个台灣鐵路通車，就在頭重坑設站，係當時楊梅壢地區唯一个火車頭。經過五年，日本人來過後个明治32（1899）年7月20日，正廢忒「頭重溪站」，車頭徙到楊梅去。

　　日本人个火車頭安到「驛」。明治41（1908）年，將東片明治33（1900）年設个安平鎮車頭徙到草湳陂脣，本來安到「草湳坡驛」，安平鎮嗄無火車頭咧！聽講在當地人士建議，還過地主姓黃人个捐地之下，同「草湳坡驛」改到還係「安平鎮驛」。到大正9（1920）年，全台灣大改名，正安到「平鎮驛」。故所，當時个「草湳坡」乜安到「平鎮」。

　　頭重坑廢站吔！東片又設火車頭，有兜人徙到「草湳坡」去，鬧熱个頭重坑街市開始沒落，到這下尋毋着當年个車頭跡同月台吔！伸着一座埔心居民信仰中心「三元宮」老廟（圖1）。



　　　　　　　　　　　　　　　　　　　圖1 頭重溪三元宮過廟後背个高樓（2018.11拍攝）

　　還過一排排仔舊式个矮屋仔定定（圖2）。毋過自從楊梅交流道通車過後，邊脣發展當遽，高樓大廈一間一間仔起起來，頭擺人講「風吹牛鼻頭」个所在，這下也人尖人極吔！



　　　　　　　　　　　　　　　　　　　圖2 頭重溪三元宮過廟脣个舊矮屋（2019.07拍攝）

　　外地人坐火車愛去平鎮，下車嗄尋毋着平鎮街路，走到「草湳坡」來，為着愛分別真假平鎮，還過當地人試着「草湳坡」毋好聽。光復過後，民國39年楊梅鎮民代表大會通過，正式改名變「埔心」，大約怕係取這荒埔肚人口集中个意思，「平鎮車站」也在民國44年3月初1改到「埔心車站」。

　　「草湳坡」本係全客人个庄頭，光復過後來當多外省人，設當多新村，像四維、五守、三龍、成功、光華新村，又有味全牧場、工業區，加上原來就有个茶葉改良場，工商業快速發展，嗄變到觀光、旅遊、工作个好所在，外來人口增加當遽，新興路市場肚國語、學老話吱吱喳喳、喊喊咄咄，客話嗄緊來緊少聽着吔！

　　埔心有火車頭過後，人口緊徙落來，形成街路、市場，慢慢變到「草湳坡庄」，到今也超過百年之久吔！到這下，「草湳坡公學校」早就改到「瑞埔國民小學」；十過年前草湳陂也囤忒做路、做工廠，變到埔心車頭个後站。車頭面前个「平鎮旅社」同「平鎮醫院」跈等縱貫路拓寬消失忒吔，就伸着車頭斜對面个「草湳派出所」還保留等草湳陂个舊跡，分後人懷想頭過个歷史記憶定定。（圖3）







徐貴榮教授 聲檔 — 埔心个過往今來（四縣腔）

▲BACK