石頭牯爆出來介

【文／何石松】

 

　　石頭牯爆出來介，係一種單句諺語。毋好小看這句諺語，佢介意義內涵共樣係盡豐富又深入。雖然，一般來講，講別人係石頭牯爆出來介，係講佢不孝又合無人性；不通情理，又無人情，完全毋知爺哀生養介辛苦。事實上，石頭牯爆出來介，毋單淨當有人性，為百姓服務，做人民介保護神，還能賜福分大家。

　　可能盡多朋友，在細人仔時節，因為試著生趣，就會問阿姆：「𠊎係哪位來介？」做哀仔介人大體會講：「你係石頭牯爆出來介！」哇！石牯爆出來介，感覺盡奇怪，該石頭牯恁硬，仰可能從該硬確確介石牯爆出來呢？這可能毋係一件簡單介事情。對細人仔來講，會引起佢兜盡多想空想缺，奇奇妙妙介想法。對爺哀來講，雖然摎現下正確生理現象無幾共樣，但是這係一句嶄蠻有意義又有內涵介委婉語，還牽涉上早介神話，係有深度想像介文化詞彙。

　　總講，這係一句分爺哀子女都能夠發揮想像空間介語言教育，係爺哀想愛講又講毋出嘴介，係父母望子成龍，另外一種反省介啟發教育，輕輕一點，分佢去想，希望能夠一踢三通。因為有這恁好介想像力，係科學文學歷史合做共下介產品，這就係上年人盡普遍介想法。

　　𠊎俚介祖先，在上早時代，就對石牯非常尊敬，可以講係一種石牯崇拜，因為石頭牯，係大地介原動力，係萬能介，係事物介源頭。所以女媧娘正拿五色石來補天。石牯，除了補天，也能治水，聽講頭擺江水為害，李冰就尋五隻大石牯，兩隻放在官府中，一隻放在石橋下，另外兩隻放在水竇肚，來制壓水精，因此，風調雨順。除這以外，還能化育萬物，石頭牯，像爺像哀，後來慢慢形成石爺石哀，來做人類介保護神。所以，盡多人摎神，係石頭牯爆出來介。

　　聽講，上早石牯爆出來介係堯介哀仔。有一日，突然之間𥍉爧金光，通天透地，電光石火，雷公並拚，火蛇緊鑽。結果，有紅紅介血一直流在石頭牯裡背，無幾久，就降出一個細妹仔，安到慶都。慶都緊大緊靚，有一日，行在青山綠水之間，無想著，天頂飛來一條赤龍，嗄捲在慶都介身上，一下之間，慶都就懷姙咧，佢懷姙到14隻月，正降出一個嬰兒，名安到堯。有人講，佢就係三官大帝介天官。毋單淨恁仰定定，太元玉女也係石牯爆出來介，佢就係天上介太元聖母。

　　 還有三界爺之中介水官，佢就係歷史上介大禹，大禹神力，能通萬里，因為能治水，功勞當大，又能理好國家，所以分封為水官，所謂「禹生於石」所以，盡多人話著佢係石頭牯爆出來介。不過，厥徠仔――啓，就正經係石牯爆出來介。

　　大家都知，大禹治水當煞猛，做到頭烏面暗，有日無夜。有一擺，愛炸開大山來治水時，佢摎厥餔娘講：「韶早𠊎愛炸山，當危險，所以在韶當晝送飯包來介時節，用鼓聲做記號，你聽著打鼓聲，就送飯來。」第二日，愛做開山打林介大工程，無想著，一隻石牯「博唧」一聲，嗄打著鼓，鼓聲朗天朗地，厥餔娘聽著，斯送飯來咧！奇怪，這下介大禹，嗄變做一條大熊，當得人驚，厥餔娘看著，驚到面色瀝青，起腳花就飆等走，走到嵩山下背，化做一隻大石牯。大禹大喊一聲：「毋好走，你遽遽轉來啊！」大石牯就爆出一隻嬰兒來！該就係大禹介徠仔，名安到啟。啟，就係開介意思。佢，也係石頭牯爆出來介。

　　還有孫悟空，也係石牯爆出來介。佢有通天介本等，金剛不壞之身，上天入地，水浸火燒，佢全毋驚。翻隻筋斗，就十萬八千里；挷條猴毛，變做千軍萬馬。騰雲駕霧，七十二變；翻江倒海，神鬼都驚。一心保護唐僧西天取經，正經係善良天性，除妖避邪，普渡眾生，修成正果，分大家尊敬。

　　這恁多石牯爆出來介，像慶都、天官、水官摎孫悟空共樣，總係為人民服務，㧡等恁大介社會責任，係大家介保護神，佢哪會無人性，無人情呢？可見，石頭牯爆出來介――正經係未可限量啊！

※此處的「介」為大眾通用的「的」，同教育部訂的「个」之意

　　

何石松 聲檔 — 石頭牯爆出來介（海陸腔）

▲BACK