客家个道嘆

【文／羅肇錦∕國立中央大學客家語文暨社會科學學系榮譽教授】

 

　　客家史 道嘆史
　　你道生 亻厓嘆死
　　生生死死無人知

　　頭嘆客人一垤砧枋肉
　　隨在人剁 隨在人刺

　　二嘆祖先前世無修
　　歇到山崗璧壢肚
　　無米好食食番薯
　　還愛
　　疲爬極蹶
　　徙來徙去
　　半飢半餓
　　尋無事做
　　
　　三嘆客人無字好記數
　　無字好用
　　拗淨手指毋罅
　　東片借 西片鬥
　　撈湯洽水 鬥鬥揫來
　　刻耐編出 各言雜字
　　
　　四嘆客人讀書
　　本來毋識字
　　安到嶺南獠（人）
　　正會寫 嶺南貉獠（山人）
　　人笑你畫麼个東西
　　等到當會 寫文擂墨
　　就變種變名
　　講係中原下來个客人
　　五嘆𠊎會个𠊎話
　　喙講出來个話 係本成个山話
　　手寫出來个文 係鬥出來个新話
　　一代鬥 二代變
　　三代走聲又變羴
　　阿公講个變鬼話
　　後生怪你 扛扛出去做麼个？
　　阿婆惜你 搵屎个tomato當好食！
　　
　　六嘆客人个客話
　　本來祖先講輋話
　　過來安到瑤話
　　再過安到畲話
　　識字過後
　　煞猛學官話
　　安到客家話
　　這時節
　　毋只會讀聖賢書
　　還會講猴話
　　存著个 一息仔阿姆話
　　留分後代子孫話話話
　　
　　七嘆緊來緊少
　　緊來緊少人肯講客話
　　緊來緊少人會講客話
　　緊來緊少人會講話
　　緊來緊少人講話
　　緊來緊少人
　　緊來緊
　　八嘆客話難救
　　客話還吂救著
　　就愛分臺灣客中國客
　　又愛分綠色客藍色客
　　還愛分南四縣北四縣
　　最背尾
　　發夢毋知身係客
　　一場笑談
　　
　　九嘆閃話無恁該
　　愛留客話 就愛閃
　　閃日本 閃美國
　　還愛
　　閃學老 閃國語
　　閃開政府閃自家
　　等到
　　自家就愛閃開
　　還有麼个好閃？
　　
　　十嘆客家無歷史
　　頭嘆到尾嘆
　　係講看毋識
　　該就來道嘆
　　道嘆客家無歷史
　　客家史 道嘆史
　　你道生 𠊎嘆死
　　生生死死無人知
　　
羅肇錦教授 聲檔 — 客家个道嘆 （四縣腔）

▲BACK