師潤

【文、圖／聿／國立中央大學客家語文暨社會科學學系學生】

 

第一章

　　又係一個得人惱个朝晨，潤打開窗門，看等外背老鼠色个天，心情也變到盡差。毋過，就算係恁樣，係佢去到學校，看著該個人，該兜壞心情一下就會全部毋見忒。

　　一行落去教室，佢總係開容笑面个摎逐個同學相借問，講等恁早，問大家昨晡日過得樣般，作業有寫無這兜話，同大家有講有笑，看等就係一個盡得人惜个人。

　　佢今年26歲，有一頭長長个頭那毛，烏色帶等一滴仔咖啡色，還有一息仔自然捲，在電火底下，看等當靚，當餳人。

　　佢有兩個圓圓个大目珠，當佢看向𠊎兜，總係做得感覺到佢目珠裡肚，該淰淰个溫柔。

　　佢瘦瘦个，著麼个衫都盡好看，有時節會著西裝，有時節會著平常个衫，頭前總有一個繫等个揚蝶仔結；有時節也會著恤子，旦旦都係當亮个色，像係白色、黃色、水紅色，毋過也有深色个，像係豬肝色、深綠色這兜，試著佢著麼个都當合適。

　　逐日看等佢上課个背影，佢个面，佢个笑容，聽等佢甜甜个聲，課本裡背該兜內容，親像就無恁無聊咧；朝晨个壞心情，試著也分佢个聲融忒咧。

　　從盡早以前，潤就恁樣分佢深深餳等。

　　從盡早以前，潤就恁樣分佢深深餳等。

　　毋過，該時節个潤，還毋知自家會同佢有一段特別个關係。

　　該個人，就係佢个班導師。

第二章

　　同平常共樣个上課日，先生在頭前發考卷，喊著潤个名仔个時節，佢慢慢仔行到頭前，先生看等潤講:「考盡好喔!毋過還係有進步个空間！」

　　無定著係因為看著先生个笑容，潤眼視視仔看等佢个面，看到戇忒，到先生輕聲喊佢个名仔，佢正回過神，續等分佢一個淺淺个笑容，說咧一聲:「嗯，承蒙。」就轉去咧。

　　下課个時節，潤一個人行在走廊上，突然間，感覺有人打咧厥右片个肩頭，轉過去一看，原來係先生。

　　「你仰般咧？看你有一滴仔心神不定，假使有麼个問題，都做得來尋𠊎喔！」先生笑頭笑面个同潤講等。

　　—無想著先生會注意著𠊎。

　　在潤恁樣想个時節，佢試著有一種燒燒个感覺一路鑽到厥个面頂。

　　「無啊先生，𠊎盡好，毋使勞煩。」佢略略仔低頭，毋想分佢看著該通紅个面。

　　「正經？好啦，總講有問題个話，無勉強自家喔！」先生話肚帶等一滴仔無奈，講算以後，就轉去辦公室咧。

　　潤看等佢个背影，想等頭先該個讓佢漲紅面个熱流。

　　------

　　柑仔色个天，伴隨噹噹个鐘聲，終算下課咧，全學校个學生都帶等悿悿个面，慢慢仔向等校門口行過去，毋過潤佢个面頂嗄帶等笑容，因為頭先佢接著盡久無看到个學姊个電話，講愛請佢去啉酒，順續打嘴鼓一下。

　　「雖然𠊎還吂成年，毋過啉一滴仔酒也無麼个關係吧！」帶等恁樣个心情，潤來到約定好个酒店。

　　一到店門口，佢就分兩個盡大箍个人攔下來，無分佢落去。

　　該毋使想，當然係因為佢著等學校个衫褲，不管佢个面看起來有幾成熟，還係囥毋核佢係學生个事實。

　　—發病，𠊎竟然毋記得轉去換衫正出門。但係同學姊約定个時間又愛到咧…

　　佢本來打算打電話同學姊講今晡日可能會有一滴仔慢到，但係，無提無防，有個人抓咧佢个手骨。

　　「佢係摎𠊎共下个。」

　　學姊軟聲軟斗同兩個大箍牯講等。「學姊，𠊎……」話還吂講煞，潤就分學姊拉落去店肚咧。

　　「你在做麼个啊?做麼做毋得落來？」學姊細聲同潤講，「一看就知咧……」佢表情尷尬个指等身項个衫。「你吼……仰會還係恁樣戇戇个……算咧，無管該咧，遽去啉酒咧！」

　　—雖然啉酒係盡暢个事情，但係，毋知學姊有想著𠊎還吂十八歲這件事情？

　　潤本來準備愛講這句話，毋過看著學姊歡喜个面，還係摎佢吞轉去心肚咧。

　　------

　　「啊~還久無恁暢咧！」學姊講等摎杯仔放到桌頂，既經做得看著佢个面變到紅裸裸，毋過看等還係當清醒。

　　「拜託一下，無啉忒多啦，𠊎斯毋知你戴哪位喔……」潤看等該兜空瓶，無奈講等。

　　「𠊎無問題啦！再過摎𠊎拿幾下罐來！」

　　—幾下罐？有影無影？𠊎仰毋知佢恁會啉

　　潤擘大目珠看等學姊，雖然試著有滴仔難相信，毋過也只好去拿咧。

　　佢敨咧大氣，從坐个位仔企起來，轉身愛行去櫃仔該位，就在該時節，佢在店仔一角看著一個當熟面个人。

　　潤看等佢流滑个頭那毛，烏色帶等咖啡色，還有白淨个皮膚，摎大大个目珠。

　　—嗯……當靚个人……仰會恁像先生…

　　—等下？先生？

　「哪有可能？先生會來這種地方?看來𠊎也有滴仔醉咧。」潤揉揉厥目珠講等。

　　但係再過認真看一擺，「該盡像正經係佢呢。」潤對自家講等。

　　—好衰毋衰……在這裡堵著先生……分佢看到𠊎還使搞？

　　-------

　　「嗯？恁無提無防？」學姊疑狐个看等潤。

　　因為驚分先生發現，潤只好騙學姊講屋下有事情，愛遽轉去正做得。

　　「係啊，敗勢啦！有閒𠊎正尋你出來!先恁樣！」潤轉頭對等學姊講，續等就遽遽行出去咧。

　　—呼！差一滴仔就會分看到咧，好彩𠊎恁精。

　　「好咧，好轉去咧，無斯會分抓著。」潤企在店門口脣邊講等。

　　「分麼人抓著啊？」一個熟識个聲在潤後背出現。

　　「當然係先生啊，該還使講。」

　　—嗯？該個聲…

　　潤慢慢仔向後背轉過去，看等該個面呰呰个人。

　　「先生……哈哈……」潤苦笑。

　　這時節，佢心肚只有一個想法。

　　—正經死無命咧。

第三章

　　「恁好膽，還吂成年就在這啉酒？」先生眼鬥鬥仔看等潤。

　　「有人尋𠊎來……所以……」潤目𥍉𥍉仔一下看等先生，又看地泥，五五十十講毋得出。

　　「有人尋你來你就來？你有用大腦思考過無？」先生提高厥个聲講等。

　　「該……先生又做麼會在這？ 」

　　「𠊎係大人，做麼做毋得在這？」先生看起來又更加火著咧。

　　「也係……歹勢……」潤細聲對等佢講。

　　—原來先生也會發火…

　　「唉……算咧，所以你盡想愛啉酒係無？也係啦，你都既經17歲咧……」

　　「𠊎無恁樣講喔。」潤趕緊擛手，想解釋清楚。

　　「毋使講咧，跈𠊎來。」先生話一講算，轉身就走。

　　-----

　　「遽啉啊，無關係。」先生看等潤講，面頂既經恢復到在學校該溫柔个表情。

　　「正經？」潤摎嘴靠到杯脣，疑狐看等佢。

　　—無想著先生講跈佢去，竟然係去啉酒…

　　「正經啦！毋過只有今晡日正做得喔！以後做毋得再過恁樣囉！好無？」

　　「恩……」

　　潤看著先生笑笑个面，又毋自覺低頭。

　　但一下又像分針刺著共樣，黏時擎頭。

　　「先生，你有男朋友無？」潤眼晶晶仔看等先生。

　　𠊎喔…𠊎有啊……男朋友……」先生看等桌頂个空杯仔，有滴仔遲疑个講。

　　—恩？竟然正經摎𠊎講咧？明明儘採問一下定定……好，直接繼續問下去好咧。

　　就恁樣，先生同潤講咧佢男朋友个事情，也順續講了其他盡多事，兩人談天談到毋知天合地。

　　--------

　　「無想著，先生你會摎𠊎講恁多。」潤講等摎盡尾一口酒啉忒。

　　「可能係因為店肚个空氣，𠊎有一滴仔醉咧……」先生用左手摸等厥紅紅个面，加上大大个目珠，看來當靚。

　　「好咧，轉去咧，這下既經盡夜咧！」先生講等，慢慢仔企起來，晃啊晃仔，差一滴仔就跌倒，好彩潤黏時走過去扳等佢。

　　「先生，𠊎送你轉去。」

　　「毋使啦，𠊎做得！」先生用軟濟濟个聲講等。

　　—原來先生酒量毋好？該還來店仔啉？

　　「噗！」潤忍毋核笑出來。

　　「你在笑麼个？」先生嘴嘟鼻翹看等佢。

　　「無啦，𠊎試著先生你盡得人惜。」潤向下看等先生，該個時節正發現，佢兜兩儕偎盡近，店肚个人也緊看等佢兜。

　　「你……學生做毋得恁樣撩先生！」先生一手搭等潤个肩頭，一手指等佢。

　　「好好好，𠊎兜先轉去正講。」潤一片講，一片遽遽摎先生帶出去外背。

　　------

　　「先生，既經到咧喔。」潤看向目睡摸些个先生。

　　「嗯……好……」先生一隻手搭在潤个頸根頂，慢慢仔行下來。

　　因為該個時節既經無公車摎捷運，所以佢兜只好坐計程車。一下車，看著个係盡派頭个大樓。

　　—先生原來恁有錢……毋知係自家買个還係男朋友買分佢个？

　　「這係𠊎自家買个喔。」

　　—恩？讀心術？

　　「恁樣喔，𠊎試著當慶。」

　　「……」

　　「先生？ 」潤看向下背，只有看著一個睡忒个面。

　　—竟然睡忒咧？！頭先毋係還在講話？

　　「無辦法，遽兜帶佢轉去吧！」潤無奈个笑等。

　　雖然講係恁樣講，但係因為電梯在維修保養，兩儕係用行个行到先生在八樓个住所。毋過儘管爬梯排爬到氣凹凹仔，潤還係盡歡喜，因為摎先生行在狹膣狹極个梯排，佢甜甜个氣息蒙等自家，做得在厥脣邊放勢仔摎這兜味緒吸入胸腔肚。

　　------

　　「嘿咻！」行到屋仔之後，潤細心細意分先生睡到眠床頂，續等就輕手輕腳在間肚望東望西。

　　「嗯？這就係先生个男朋友？」潤拿起一張在櫃仔頂个相片，外背用白色个相框裝等。

　　—哇……生到恁緣投，又盡高，看起來也盡有錢，根本就係人生勝利組，𠊎完全無辦法摎佢比……毋過佢兜係遠距離戀愛，難講……

　　「潤，你在看麼个？ 」

　　「啊！先生你醒囉？無啦，在看相片！相片定定！ 」潤分先生無提無防个講話嚇著。

　　「喔……算咧，該毋重要，再……再過來啉酒！」

　　「還愛啉？！你都既經醉到恁樣咧……」潤看等先生強強會眨起來个目珠講等。

　　「麼人醉咧？𠊎看起來像係醉咧？」

　　「你恁樣不管仰般看都係醉咧！」潤苦笑。

　　「毋管！」先生講等就酒醉摸些个行過去，抓等潤个手骨，想直接摎佢拉去啉酒。

　　「等下！你敢毋係先生？先生做毋得恁樣啦！ 」

　　「該這下就無喊𠊎先生！ 」

　　聽著先生恁樣講，潤正經差一滴仔就愛笑死。心肚想等，係講等先生清醒過來摎佢講這件事，佢个反應肯定會盡生趣。

　　「遽兜啦！」先生用得人惜个聲講。

　　「好啦~~」潤个聲肚，帶等無奈，還有一滴仔歡喜。

　　恁樣个先生，這下，只有𠊎看得著。

　　臨尾，兩儕正經又啉酒啉到三更半夜。

　　------

　　嗯？這係麼个東西？軟濟濟當好摸，還有滴仔暖燒暖燒个…

　　潤慢慢仔擘開目珠，認真一看。

　　「這！這係先生个……！」

　　潤歸個人嚇到彈起來，毋敢相信眼前看到个畫面。

　　先生仰會只有著等底衫仔睡在𠊎脣邊？還有𠊎做麼會睡在這位？這到底係仰般啊？

　　在這時節，先生也睡醒咧。

　　「嗯……𠊎个頭那……」先生一隻手摸等因為食酒醉而溫溫仔痛个頭那，一隻手食力摎身體撐起來。

　　「頭先盡像有人摸—」先生話講到一半，擎頭看著在佢脣邊个潤，嘴擘擘講毋出話，戇戇看等自家。

　　「呀！！！！！！！！！！！！你仰會在這位！！！！」

　　先生嚇到趕緊倒退，續等紅等面摎皺皺个衫褲抓過來，想愛遮等自家。

　　「𠊎也毋知啊！𠊎一䟘床就發現自家睡在這……」潤个目光分衫褲後背該完美个身體曲線餳過去。

　　先生注意著潤个目光，用同平常共樣甜甜个聲講等:「無看這片……」續等驚見笑个摎衫褲向上拉。

　　潤瞬間試著自家个面，這下肯定摎鑽到厥面頂个血共樣紅。

　　「啊！敗勢！𠊎這下就出去！」潤講算就緊躁躁仔走出去。

　　確定潤出去之後，先生看等眠床，躁躁回想昨晡日暗晡頭發生个事情。

　　這時節在門外背个潤，滿腦都係先生著等烏色底衫仔个畫面。

　　還有，佢燒暖个體溫。

　　第四章

　　—哈……竟然分佢看著咧……

　　先生紅等面，一片換上平時著个白罕白罕个短袖摎甜粄色个長褲，一片想等該尷尬个場面。

　　—𠊎一個先生到底在做麼个啊……

　　佢敨咧大氣，慢慢仔打開門。

　　「啊！」一打開門，就看到潤企在門口。

　　「先生……該個……」潤低頭看等地泥，因為頭先个事情，佢有滴仔毋好意思看先生。

　　「等下，等下正講……」先生自家也感覺到該種尷尬个空氣，所以擎手愛佢無再過講。

　　「你肚屎枵無？先生去變食分你。」

　　還吂等佢回答，先生斯頭也無轉遽遽行去灶下。

　　---------

　　兩儕隔等一張咖啡色个桌仔面對面坐等，恬恬仔食朝。

　　「該個……昨晡日……」潤略略仔擎頭。

　　「阿！昨晡日喔？你係講𠊎兜食酒醉又共下睡該事情？」先生慌慌張張个講。

　　「𠊎……𠊎正經係一個毋稱職个先生……你毋使想忒多！該都係先生毋著！」

　　想愛揞等厥个緊張，先生強強蠻在面頂尖一個笑容。

　　潤無講話，只係看等先生，像係愛講麼个又講毋出來。

　　先生看著厥个面，試著盡尷尬，本來在該拂來拂去个手也慢慢仔放下來，細聲講等：「敗勢……𠊎明明係先生……還這個樣相……」

　　烏色帶等一滴仔咖啡色个頭那毛，因為頭那略略仔向下背彎，摎佢靚靚个面遮等，但係還係遮毋核厥目珠肚淰淰个歉意。

　　「先生……」

　　「嗯？」大大个目珠從頭那毛个縫仔肚看出來。

　　「雖然你摎𠊎講恁多，但係𠊎根本毋記得到底發生咧麼个事情……只記得啉酒啉到後背頭那盡昏，就直接睡忒咧……請問……你還記得麼个無？」

　　「其實……𠊎也毋記得咧……盡像也係酒啉忒就直接睡咧……」

　　—阿姆哀……𠊎仰會恁無用……而且這種事情假使分厥爺哀知咧…

　　潤用手撐等一片个面，看等自家在該位苦惱个先生。

　　—煩惱个時節也恁得人惜。佢个嘴角略略仔揚起。

　　先生無注意个時節，潤也順便摎先生个身體上上下下端詳咧一遍。

　　—先生个身材……有影盡好……特別係上半身該……

　　潤看等先生个胸脯，腦肚又出現該烏色底衫仔个畫面。

　　—烏色……有花紋在頂背……做得看到……毋著毋著毋著！𠊎在想麼个啊？！假使逐擺看到先生就會想到這，之後還仰般面對佢？

　　因為自家个邪念，潤盡大力抨咧自家一巴掌。

　　「潤？你做麼咧？」先生有滴仔著驚著，厥个聲明顯變高。

　　「啊哈哈～無事無事！」

　　「係無……」先生用疑狐个面看等佢。

　　—這種事情最好係做得摎你講！

　　「毋管該，頭先𠊎想著𠊎還吂摎你爺哀聯絡，來，電話號碼分𠊎。」先生企起來準備去打電話。

　　「啊……毋使打啦！」潤伸手想愛擋等先生。

　　「做麼毋使打？ 」先生無停下來,還係繼續往電話該位行。

　　「因為……𠊎成時會戴外背……」潤的眼神略略仔看向脣邊。

　　「……」先生背對等潤,眼視視仔看等壁頂个畫。

　　「𠊎還係試著做毋得……這需要解釋清楚…… 」

　　—雖然𠊎無打算愛摎佢兜講，𠊎兜睡到共下該事…

　　無提無防，潤轉身一個箭步走過去,抓等先生拿等電話个手腕。

　　「你做麼—」

　　頭那一轉過去,潤个面就在面前,大概10公分个距離。

　　「毋使解釋……我兜之間無發生麼个事情」潤用平靜个語調講等。

　　「就算有……𠊎也會負責。」佢在先生耳空脣邊細聲講。

　　先生因為潤講話个氣息而歸身酥麻。

　　「你……該樣也無係理由……」

　　先生紅等面轉過頭，用軟軟个聲講。

　　—𠊎在做麼啊？！做麼就分佢靠到恁近……？先生心想。

　　「先生……」

　　「嗯？」

　　先生還來毋差反應，潤就既經兩手摸等厥肩頭，摎厥个嘴脣貼在先生該粉紅粉紅个嘴脣頂。

　　「唔？！」先生兩隻手縮在胸前，擘大目珠看等潤。

　　佢花咧幾秒鐘在心肚想等，𠊎愛仰結煞？𠊎應該發譴無？

　　「先生，𠊎試著𠊎—」毋知麼个時節，潤既經從先生个嘴脣頂離開。

　　啪！—

　　先生對等潤个面一巴掌抨下去。

　　潤又用該目𥍉𥍉个眼神，回望等先生。

　　「你……你話著你在做麼啊？毋管仰般，你都做毋得摎先生浸嘴啊？」

　　—無毋著，𠊎係先生，佢係𠊎个學生，𠊎愛像一個先生，好好教佢正做得。

　　「還係你想愛摎𠊎講，你喜歡𠊎？想愛摎𠊎談戀愛？ 」

　　潤略略仔擘等嘴，像係想講麼个，毋過佢只係恬恬仔低頭。

　　—做麼毋講話……？無成正經係……？

　　這瞬間，在這像分凍結个空氣肚，窗門外背鳥仔个叫聲摎時鐘个滴答聲，聽起來都特別遠。

　　「……時間差毋多咧……」先生劃破該分人講毋出話个空氣，同時摎緊拿在手項个電話放轉去櫃仔頂。

　　「潤……好轉去咧……你屋家人肯定盡擔心……」先生慢慢仔臥頭，看等潤面頂頭先分佢打到紅紅个地方。

　　「嗯……敗勢……先生……」佢回答个聲當澀。

　　「𠊎先轉咧……」潤續等講，一片行去拿厥个書包。

　　先生無講話，只係聽等潤个腳步聲緊來緊遠，著鞋个聲音，打開門个聲，續下來—

　　啪嗒，關門个聲。

　　—該算麼个啊……該種表情……無成愛𠊎講𠊎其實也盡喜歡佢，再過摎佢浸嘴？

　　先生向後背退，身體凴等櫃仔，一隻手揞等目珠。

　　—也從𠊎个立場想看啊……這個大戇牯…

第五章

　　「好咧，今晡日就到這。」先生對等下背該兜下一秒就愛橫落去个學生講，續等，佢臥頭看等時鐘，想著今晡日無來上課个潤。

　　雖然三日前發生該種事情，但係還係愛做好學生个本分正著啊！ 先生在心肚忍毋核怪怨。

　　續下來，一節課、兩節課過忒咧，上下課个鐘聲來來去去，就像先生這下个心情。

　　—都既經當晝咧……還正經無來……

　　先生坐在辦公室裡肚，轉頭看等壁頂个時鐘。

　　雖然盡掛心，毋過佢也試著，潤只係因為愛看著自家會有一滴仔尷尬正恁樣，所以也無去打電話。

　　等天光日正來摎佢好好談一下！先生在心肚恁樣按算。

　　但係到了臨暗頭个時節，先生接著潤厥阿姆个電話，講佢還吂轉去屋下。

　　該……恁樣講个話……先生感覺到背囊一陣發涼。

　　掛電話之後，黏時抓等外衫就走出去。

　　「做咧該樣个事情，最好係有面去學校……」潤揇等膝頭，下𪘒放在頂背，坐在附近公園个草地頂。

　　假使𠊎在該時節，直接摎先生講𠊎喜歡佢……。

　　潤想咧一下。

　「無，根本就無可能好無……」潤笑等講。但係該笑容跈等就毋見忒，代佢出現个係牙研目皺个面。　

　　正經摝死人咧……。

　　佢摎頭那埋落兩隻腳之間，細聲講等。

　　突然間，佢感覺有人輕輕𢼛咧厥个頭那。

　　轉頭向頂背一看，係先生。夕照照在厥白淨个面頂，看起來特別刺眼。潤心想。

　　「你在這做麼啊？𠊎尋你尋當久你知無？若姆還打電話分𠊎，害𠊎擔心到愛死，試著你係毋係想毋開……」先生用該甜甜个聲講等，分潤个心頭縮了一下。

　　—想毋開？潤試著當好笑。𠊎會恁樣就想毋開？還有恁多事情等𠊎去做，𠊎—毋著，其實，𠊎自家也毋知。

　　「敗勢……𠊎就係……走東走西定定……」潤轉頭看等臨暗个天，儘採講講撮假過去。

　　「你正經係……」先生敨咧大氣。

　　佢看等潤講：「先生知你係因為前幾日該事情正無來上課，雖然該確實有滴仔無辦法原諒，但係，先生試著你只係因為酒醉還吂醒，頭腦毋清楚正會該樣，所以，𠊎決定原諒你。」

　　—頭腦毋清楚？潤摎這句話反覆在心肚念咧幾下擺。

　　「來，無事情就好轉去咧。」先生略略仔磬下去，伸出手，面頂帶等摎平常共樣个笑容。

　　恁樣就好咧。先生心想。𠊎做毋得回應佢，就算…

　　先生食力个摎潤拉起來，毋過因為忒大力，兩儕之間又變到只有一根手指个距離。

　　「啊！敗勢！𠊎太大力咧！」先生趕緊講。

　　「我該時節頭腦盡清楚。」

　　潤無插先生个話。

　　「我係正經盡喜歡你，先生。」潤眼視視仔看等先生，眼神當堅定。

　　「莫……莫摎𠊎……」先生頓頓仔講，「開這種玩笑咧……」

　　「這毋係玩笑，我從盡久以前就當喜歡先生你咧。毋管係你上課个背影，講話个時節該甜甜个聲，烏色帶等一滴仔咖啡色个頭那毛，還係上禮拜食酒醉該時節个樣相，𠊎全部都喜歡。」

　　講煞，潤恬恬仔看等先生。

　　這時節，先生感覺自家就像企在遠方，看等自家个面頰卵緊來緊熱。

　　—𠊎做麼會面紅……？無成𠊎……𠊎喜歡𠊎自家个學生？這種事情…

　　「你講你盡喜歡𠊎……𠊎就一定愛喜歡你？」

　　—但係……做毋得……𠊎愛拒絕佢……就算𠊎正經…

　　—正經也喜歡佢。

　　「𠊎無該樣—」

　　「無你係哪樣？你既經知𠊎有男朋友咧，無成你愛𠊎同你搞外遇？你又係𠊎學生，又還吂成年，仰做得講出你喜歡𠊎這種話？ 恁樣會毋會太狡猾？」

　　先生一片用強強會噭出來个表情講等，一片推開潤，想愛轉身離開。

　　但係無提無妨，潤摎先生个腰纏過來，另外一隻手扳等厥後腦，直接浸下去。

　　這擺，先生感覺到嘴肚兩條舌嫲交纏在共下，互相推來推去个感覺，分人都愛昏忒咧。

　　—嗯……當暢……頭那肚既經……麼个事情都做毋得思考咧……

　　「先生，」潤停下來講，「再過一擺做得無？」

　　「再過……等下你先冷靜下來……」

　　 這時節个先生，既經有一滴仔混亂，連發火都毋記得咧。

　　「毋管先生你仰般講，𠊎就係喜歡你，毋管你有男朋友還係別儕，𠊎就係想摎你共下。」

　　話講煞，潤又分先生一個唚，毋過摎頭先還有上禮拜無共樣个地方，就係這擺个先生，兩隻手揇等潤个頭那，也開始回應潤个唚。

　　—嗯？！先生？！佢恁樣無成係……潤在心肚揣等。

　　過一下，兩儕分開來，嘴脣頂還牽等絲，還有對方个溫度。

　　「你……就恁喜歡𠊎……？ 」先生紅等面，臥頭看等這個分佢心躁躁个人。

　　「就恁喜歡你。」講煞，潤輕輕牽起先生个手。

　　先生也有一滴仔遲疑个，揢等厥个手。

　　兩儕就恁樣，在華華月光个照射下，共下行路轉去咧。

　　

　　𠊎……毋管係做為一個先生還係細妹仔，都失格咧。

　　這時節，先生親像聽著有麼个東西，在心肚慢慢仔碎裂个聲。

　　

　　完

(四縣腔）鄭昱欣 聲檔 — 師潤

▲BACK