兩個當相近个漢字【言】、【音】

【文／范文芳∕國立清華大學中國語文學系退休教授】

 

ㄧ、從字形結構講起

　　從物理學个角度來看，物體發出震動，產生音波，假使生物發出某種音波，致使對方接收著某種訊息，達成一兜溝通个功能，裡種聲音就係其語音，但係人類个語言比較複雜，雖然人類个複雜語言，還係用語音來傳達，毋過其語音个結構就相當複雜。

　　1.【言】字个結構，上半部，有三種比較有名个講法，一者講該係舌母，另外一種講法係古時用來刺刻个尖針【辛】，第三種講法，認為係古時管狀樂器。

　　2.【音】字个結構，上半部同【言】本來相同，後來形體變動，變成【立】字，下半部從【口】變成【曰】，原來【言】【音】兩字同源，後來分化為不同个字形、字意、字音。

　　3.說文解字个講法，【言】字從口辛聲，為形聲字，【音】字從言含一比較像會意字。

　　

二、字意个演化

　　1.《說文解字》音，聲也，生於心有節於外謂之音。宮、商、角、徵、羽聲也，絲、竹、金、木、匏、土、革、石音也。

　　2. 劉慶俄 《漢字形意通釋》：舌上有一短橫，指舌在動，所發出之聲。

　　3. 廖文豪 《漢字樹》：言內再加一筆，表示口中含葉片，發出美妙之聲音。

　　4. 左民安 《 細說漢字》： 上為簫管形樂器，口吹樂器，音、言同源。

　　5.《爾雅》：大簫謂之言。

　　6.日本漢學家白川靜：口象古時祭告祝禱時所用之器，辛象尖形長針，意指向神立誓，如所言不實，願受黥刑。

　　7.現代漢語，音多保留名詞之用法，如聲音、音樂、音信、音容宛在。言字用法演變較多，當名詞用，可以係文字，像五言詩、七言詩，係指五字一句，七字一句。言也可表示語言、言談、言論，言也可做動詞，就係說、講个意思，像胡言亂語，言之成理、童言無忌、君無戲言。

　　

三、字音个討論

　　1. 在廣韻裡肚，言字係語軒切，韻母類別係元韻，聲母係疑母，台華語音{yan}台福語音｛ggian｝，台客語音｛ngian｝。音字係於今切，韻母類別係侵韻，聲母係影母，台華語音｛yin｝台福語音｛im｝台客語音｛zhim/yim｝。

　　2. 在漢語語音演變歷史中，次濁聲母｛疑｝、｛影｝在現代華語已經消失，全變為無聲母，台灣現代漢語則保留較多中古漢語遺跡。

　　3. 如果再加細分，台華語【言】音｛yan｝【音】音｛yin｝，台福語【言】音｛ggian｝【音】音｛im｝，竹客語【言】音｛ngian｝【音】音｛zhim｝，苗屏客【言】音｛ngian｝【音】音｛yim｝。

　　4. 在母語教學个角度來看，台語比華語難，同樣係台語，客語比福老語難，同樣係客語，新竹腔比苗屏腔難。


（海陸腔）范文芳教授 聲檔 — 兩個當相近个漢字【言】、【音】

▲BACK