大湖國小第十一屆同學會

【文、圖／彭欽清／國立政治大學退休教授】

 

　　民國三十九年入學，四十四年畢業，算起來係光復後第十一屆。𠊎這兜總共有三班，甲班總下細倈仔，乙班男女共班，丙班做盡細妹仔，三班加加起來有一百六十零個。

　　畢業過後，有人升學，有人在屋下耕種，有人出外莊。等到二十零歲仔，大家頭路較定貼吔，在臺北个同學下擺仔會見面食飯，講着讀小學个事情就試着當生趣。有緊來緊多个同學來參加，六十九年就在吳森雄同學開个芷園餐廳正式成立同學會。恁多年以來个會長、副會長係:(1) 鍾育森，林美惠(2) 徐言，張杰梅(3) 黄豐宏，（小）陳惠美(4) 賴明海，徐享捷(5) 徐享捷，黄豐宏

　　有一年大家講無就轉去大湖國小來辦，同學來會歸百儕仔，有个還帶老公、餔娘同細人仔共下來，先生乜來十過個，辦到真鬧棚。下後逐年就有辦，毋係在苗栗辦就係在臺北，取交通利便，大家較好到个所在。

　　頭幾擺仔在苗栗過大湖辦該下，有幾下個同學堵堵好做辦桌个生理，就拜託佢這兜辦。背尾有同學講，恁樣毋係盡好，煮食个同學愛煮分先生同學食，就講無打出本，乜毋敢賺，名講同學會，嗄做到像猴核，無好坐下來同大家打嘴鼓。故所，下後見辦就去飯店食。

　　有幾年仔辦旅行，大體係兩日一夜。民國八十二年，大部分个同學五十歲，同學會去燒水（大安溫泉）辦，來吔七、八十儕，歇在警光山莊，這係日本時代个警察招待所，該暗晡異多人食到醉摸摸仔。

　　民國一百年，大湖國小一百週年，各屆个畢業生當熱烈參加，吾這屆个來吔怕有歸百儕仔，有好多個係畢業過後吂識看過个。畢業該下總概都還子子，這下還有該形款仔，毋過有个頭那毛白白，有个光頂。該朝晨各屆个同學先在一間教室見面講冇訕，當晝全部个校友同先生在學校个運動坪辦桌食。

　　吾這屆有一個同學林志杰事業做盡大，在臺灣過大陸就開有電機工廠，賺異成錢，這擺學校一百週年，佢捐一百萬分學校。同學大家講愛佢來做榮譽會長，大家監等吔，佢講同學會个事情佢怕無恁多時間來插，其他个佢會盡量支持。恁多年來，好得有前後任个會長、副會長這兜同學同大家奉工，摎同學會辦到當周到，正經係：敢擎獅頭異曉得弄。這成十年仔辦个旅行，三日兩夜較多，食宿大體係榮譽會長出个，還送大家手信，自家正墊多少仔定定。同學會辦到恁鬧棚，有多少仔名聲，有一年還有電視臺來翕。

　　恁多年來，同學會還整有line个社群，好分大家來交換消息。在北部个同學，下擺仔湊啊着就歸陣仔共下去附近仔遶尞、食飯。

　　老古言語講个：「百年修得同船渡，千年修得共枕眠」，大湖國小第十一屆个同學大家共下讀六年書，過忒年就結緣會七十長年吔，做得講情分一等深。

(四縣腔）彭欽清教授 聲檔 — 大湖國小第十一屆同學會

▲BACK