最後个夥房

【文、圖／鍾榮富／南臺科技大學應用英語系講座教授】

 

　　「夥房」係客家人傳統建築个專有名詞，又有人寫做「伙房」。客家人「長恨所居毋遠，所歇毋密」，故所大部分客家人歇个地方，毋係在高山地區，愛爬幾下重山，就歇啊在彎彎曲曲个小巷底背，過等「家居蒼煙落照間，絲毫塵世毋相關」个寧靜生活，與世無爭，快快樂樂。頭擺客家个夥房，紅磚綠瓦，通常係ㄇ字形个三合院，前門莊嚴，樸實。兩旁个圍牆又高大又堅固，入門都毋容易。但係三合院夥房愛大家族無就有錢人正有辦法，可惜大部分客家人，耕種絡食，三餐都有息把困難，哪有錢起三合院大屋？故所「客家夥房」無單指三合院，一般百姓个屋場，無論係起做一線个茅屋，抑係地形關係，做啊像L型个，或者起啊在竹林外背个單家園屋，都喊到「夥房」。換句話講，「客家夥房」就係客家人歇个屋仔。

　　無論如何單薄，客家夥房都有廳堂，頂上掛等（無就寫等）堂號。客家堂號最特別个係「堂」字愛放啊中間，比像講鍾家堂號係「穎川堂」，在廳堂上寫个係「穎堂川」。堂號兩片係對聯，對聯个文字各姓毋同，各有有慣例。中等以上人家，對聯上頭還會有刻花草抑係鳥仔。花以牡丹最多，鳥仔以孔雀最普遍。廳堂兩側，通常有一對窗仔，左右各一扇，頂上寫「清風」同「明月」，表示客家人个生活哲學，人生有成功有失落，不管恁仰，都係兩袖清風，心中白淨親像明月，無麼个無敢同人講。可能也就恁仰，客家人到今，有錢人毋多，無企業家，也無麼个客家大企業。

　　客家夥房頭前係大禾埕，功能盡多，同客家生活息息相關。收冬時節，禾埕主要曬穀，平常時，可以曬鹹菜、曬衫褲，也可以分屋下人泡茶打嘴鼓，同時分細人仔尞涼，搞放人尋。客家人係愛花个族群，故所客家夥房外背種玉蘭花、新丁花、圓粄花、無就元絲仔。

　　洪家夥房係高雄市最後一个客家夥房，企啊在民族路後背个寶珠溝，周圍都係高樓大廈，熱天下晝个陽光，直接可以照射到廳堂頭前，看起來盡涼爽。屋後背還有一大壢菜園，種兜日常自家愛食个青菜。對敦煌路脣看啊去，屋瓦脆紅，廂房恬靜，屋頂還有磡瓦个石頭，盡有客家特色。

　　十過年前，高雄市个「四坵田文化協會」大力推廣客家文化，舉辦各種活動，希望分高雄都會區个客家人有兜溫暖，不時還會尋客家樂團來洪家夥房唱山歌，挼圓粄，炒粄條，打嘴鼓。寶珠溝係客家人在高雄市最集中个地方，毋時在榕樹下，細廟前，還可能聽著老人家鋸絃仔，唱山歌。毋過今晡日，洪家夥房毋見咧，兩棟大樓對地表高高企起來，有天恁高。工程還在進行，大樓還在長高，夥房个影跡完全消逝了。

　　客家夥房个結構，無論內外，其實係個具體而微个戰鬥體。昔時廳堂為運籌帷幄之處，係號令中心。圍牆高築，除得防風外，主要防禦外敵同守護家園。夥房个門通常非常个狹細，便於防守。客家聚落个街道彎曲如迴腸，歧路多而路徑逼仄，無非愛讓外來者迷路，無處脫身。客家食物多醃製、多漬品，初衷在於能久積存，備用於戰時。客家人無自家个土地，故多遷徙。每次搬遷，都係連根挷起。到異地他鄉，首要之務係防禦，其次正係爭土地，爭水權，爭生存。客家夥房於是成為避難所，成為家族聚集个核心。


（四縣腔）
鍾榮富教授－聲檔－最後个夥房

▲BACK