該兜摎𠊎摎愛有關个事情

【文、圖∕賴音如∕國立中央大學客家語文暨社會科學學系客家語文研究所碩士生】

 

　　𠊎一直都想去看海，從細到大。

　　海，在𠊎想像裡肚，係無邊無際个青色，佢有浪，乜有暗藏个石仔，無論仰般講佢，都已難毋承認：佢包容萬物，故所做得有盡靚个逐種樣相。

　　還較細个時節，就算吂準備好勢，𠊎總想愛遽遽出發，較緊板兜仔，早一日出發，就早一日看着海，假使看過海，𠊎可能就毋會像大家講个，係一個無見過世面个細人仔，𠊎可能就做得自家決定自家个所有事情。這隻時節个阿爸、阿姆，對𠊎來講，像冤仇人共樣，「做麼个愛擋等𠊎，毋分𠊎去看還較大个世界？」𠊎問，想毋出原因，𠊎恅着厥兜係看毋起𠊎，試着𠊎無想清楚，想看海个願望，應該係夢想定定，想想仔就過去咧，無恁傷重。

　　已多年過去咧，𠊎讀仔還較多書、認識仔還較多人，分𠊎恅着係朋友个人傷過幾擺仔，還係學毋乖，認定一儕人，就摎做得分人个都分出去，為着認定个人，毋記得自家看海个願望，恅着有人會感動，盡後背，單淨感動仔自家，揇等企都企毋核个自家，𠊎轉到屋家。阿爸个背囊開始痀咧，阿姆个頭那毛，從耳公脣開始白，額頭脣乜有一息仔雪个色，無變个係厥兜看𠊎个目神，摎想笑詐譴个嘴唇。𠊎誠心个笑仔，像正出世个時節，第一擺分阿姆揇等，因為心安，噭到恁大聲。

　　無已久，𠊎出發咧，𠊎試着𠊎既經準備好，為着𠊎從細到大个願望，路項堵着麼个困難，應當都毋會妨害着𠊎，顛倒做得還較表現出𠊎个決心，正出發个時節，𠊎係恁樣想个。無想著，𠊎堵著个毋係困難，但係比困難還較難。𠊎堵著一個特別个人，佢無𠊎想得着个所有缺點，毋過有𠊎想毋着个該兜優點，仰結煞？無結無煞，𠊎笑到流目汁，笑自家毋罅堅定，行回頭路，死該再受傷一擺。

　　背尾，𠊎無再去想看海个事情咧，生活乜還係已做得。

　　一日朝晨，天時已好，日頭烈烈，風無盡大，𠊎堵堵睡醒，看著佢在刮鬍鬚。「恁早！」𠊎擂等目珠摎佢問早，佢看等𠊎：「還在等麼个？愛出發了！」𠊎戇戇看等佢，刮鬍鬚像刮忒所有顧慮：「看海啊！你毋係想愛看海喺？」

　　海，在𠊎想像裡肚，係無邊無際个青色，佢有浪，乜有暗藏个石仔，無論仰般講佢，都已難毋承認：佢包容萬物，故所做得有盡靚个逐種樣相。就像阿爸个目神、阿姆个笑容，就像佢一直都恁惜𠊎，願意摎佢做得付出个所有都分𠊎。

　　「毋使咧，這下想來，𠊎一直都有看着海。」摎厥手牽到核核，𠊎笑等看厥目珠，總算知咧，這，就係𠊎一生人个願望。

（四縣腔）

賴音如－聲檔—該兜摎𠊎摎愛有關个事情

▲BACK