阿祿伯──上坪个古

【文、圖／彭欽清／國立政治大學退休教授】

 

　　阿祿伯係開大湖个大姓人个後代，有讀過漢文，留兩撇鬚，有閒就鬚仔罔nunˋ，講話詩句碌碌仔；係好額人，山仔當闊，幾下甲係杉仔樹園，聽講有人愛用一份田同佢換，佢毋肯，講愛等價數較好兜仔正來賣，無想着嗄顛到落價。

　　講係恁好額，毋過盡囓，有菸願好釅茶，大體就食伸手牌。吾爸係有在屋下朝晨暗晡會泡茶，隔壁鄰舍來尞，就會拿菸出來。食飽朝食飽夜，阿祿伯佢就會來過家。莊項个人就知厥piagˋ，有人還拿佢來準歌仔唱：「阿祿伯，鬚赤赤，無菸好食嘴擘擘」。

　　佢降一個妹仔，揇一個倈仔---連申仔。日本時代，佢這兜係國語家庭，連申仔讀小學校卒業。就因爭阿祿伯囓出名，莊項个人無人敢分佢做心臼，連外莊人就知，故所連申仔異慢正討。

　　連申嫂係山項人，老實到有好伸。知厥家官囓，佢就省儆得就省，煮个菜照厥家官講个，定著愛鹹正扯飯。佢做妹仔卵該下，淨知無閒田頭地尾个頭路，毋係異曉得灶頭鑊尾个事，煮出來个菜輒常分阿祿伯嫌到臭屎。有成時會走來問吾姆愛仰仔煮正較好食？吾姆會倒兜仔訣分佢，過喊佢去河壩脣改兜仔地來種菜。

　　佢頭胎仔就降着倈仔，做阿公个暢到講毋得，喊阿祿伯姆愛同心臼好好仔做月，該怕係連申嫂一生人過來盡暢樂个日仔。

　　連申仔頭路毋成頭路，毋係賭就係嫖，聽講蹬酒家盡捨得錢。無錢吔就偷屋下个東西去當。細項下值錢个無好偷吔，就偷擎杉仔材去賣。䀯著阿祿伯兩老仔無在，就去豬欄棚項抽一大條个杉仔材，歸丈仔長，擎去賣。有一日𠊎睹好在伯公下个樹下背書，看等佢擎等杉仔材，跈大圳崎下到田脣路，毋知愛擎去哪賣？

　　連申嫂看着自家个老公恁毋像人，家官又難服侍，就走轉外家去歇，歸隻月仔無轉。阿祿伯無法，就拜託吾姆去話佢轉來。吾姆就勸阿祿伯毋好動啊着就對心臼惡桀桀仔，係無，佢乜異難開嘴，連申嫂背尾有跈吾姆轉來。

　　阿祿伯為着承蒙吾姆个𢯭手，就喊吾姆做得去厥杉仔園脣个雜樹林去撿樵。吾姆講：無想著阿祿伯這擺會恁慨。

　　連申哥下後揹債忒多毋知走去哪囥，連阿祿伯過身就無轉，尾項山仔賣淨淨。逐擺係講着這家人，吾姆就會講：子女係毋像人，身家較多，乜會了到無半息。自家增志一等重要。

（四縣腔）
彭欽清教授 聲檔—阿祿伯－上坪个古

▲BACK